Къабарты-Малкъар Республиканы Башчысы К.В. Коковну Жангы жыл бла АЛГЪЫШЛАУУ

Къабарты-Малкъар Республиканы хурметли жамауаты!

Багъалы шуёхла!

Биз 2021 жылны ашырабыз. Аны аллындагъы жылча, бу да тынч кезиу болмагъанды. Пандемия бла байламлы къыйын болумла сакъланнгандыла, алай биз барыбыз да бирлешип, хорлатмагъанлай турабыз.

Къыйын халлагъа да къарамагъанлай, саулай алып айтханда, быйылгъы жылны  ахырына жетишимли жетгенбиз. Экономиканы айнытыуда, магъаналы социал борчланы тамамлауда тийишли эсеплеге келалгъанбыз.

Республикада ишлени уллулукъларына эм ырысхы бла жалчытылыуну ёлчемлерине кёре билим бериу эм маданият, саулукъ сакълау эм спорт объектлени къурулушлары, инфраструктураны, автомобиль жолланы жангыртыу, шахарланы бла эллени тапландырыу жаны бла болмагъанча магъаналы программала бардырыладыла. Инвесторланы бла къонакъланы Къабарты-Малкъаргъа сейирлери ёсе барады.

Сёзсюз, ол жумушланы, хайырлы тюрлениулени башламчысы бизни Президентибиз болгъанды, ол белгилеген  миллет борчла, къабыл кёрюлген стратегиялы оноула.

Эмда даулашсыз, ол бары да республиканы халкъыны арымай-талмай ишлеуюню эсебиди. Багъалы жерлешлерим, иш кёллюлюгюз, урунууда жууаплылыгъыз эм ишге бериле билиуюгюз ючюн сау болугъуз.

Жетип келген жылда биз бек башы адамны, жамауатны жашауун игилендирир ючюн къуралгъан республикалы алгъа элтген стратегияны андан ары бардыргъанлай турлукъбуз.

Келир заманда жетишимлерибизни мурдорун къурарыкъ кеси кесинге ийнаныулукъ бла бирлигибизни сакълау бюгюн бек магъаналыды.

Бирлешип биз заманны къыйынлыкъларын хорларыгъыбызгъа, республиканы аллында тургъан магъаналы эм жууаплы борчланы жангы кюч-къарыу бла тамамлап тураллыгъыбызгъа ийнанама.

Жетип келген жылда Къабарты-Малкъар Республиканы къуралыууну 100-жыллыгъын белгилерикбиз. Ол магъаналы байрамны белгилеу халкъыбызны бирлигин андан да бек кючлеригине, ышыннгылы алгъа барыуубузгъа иги себеплик этеригине ийнанама.

Хурметли шуёхла!

Жангы жылны биз не заманда да жарыкъ сезимле бла сакълайбыз, келлик заманнга муратла этебиз эм аланы толлукъларына толу ышанабыз.  Жетип келген жангы жыл муратларыбызны, сакълагъан умутларыбызны толтурсун, огъурлу ишлеге эм ахшы тюрлениулеге чомарт болсун.Битеу жюрегимден сизге кийик саулукъ, насып, монглукъ тежейме.

Байрам бла алгъышлайма, багъалы жерлешлерим. Жангы жыл бла!

 

 

Поделиться: