Магъаналы жол къоркъуусузлукъ мардалагъа кёре жангыртылгъанды

Къабарты-Малкъар Республиканы Башчысы Казбек Коков Урвань эм Лескен районланы эллерини чеклери бла тартылгъан Р-217 «Кавказ» федерал трассаны ремонт этилген кесегине къарагъанды. Упрдор «Кавказ» жангыртылгъан объектни презентациясын къурагъаныны юсюнден бизге КъМР-ни Башчысыны бла Правительствосуну пресс-службасы билдиргенди.

Тюбешиуге КъМР-ни Правительствосуну Председатели Мусукланы Алий, КъМР-ни транспорт эм жол мюлкюню министри Аслан Дышеков, Упрдор «Кавказны» таматасыны биринчи орунбасары Анзор Зубкаев, управленияны баш инженери Виталий Гулаков, Урвань эм Лескен районланы администрацияларыны таматалары къатышхандыла.

Республиканы оноучусу Упрдор «Кавказны» таматаларына эм республиканы жол къурулуш предприятияларына тындыргъан ишлери ючюн ыразылыгъын билдиргенди, ол жолну энди тёрт ызгъа дери кенгертилгени, жарыкълыкъ бериуню игилендирилгени жол-транспорт болумланы азайтыугъа себеплик этериклерин да белгилегенди. Казбек Коков келир жылда да жол ишле бардырылгъанлай турлукъларын чертгенди.

«Кавказ» федерал жол участкада жол ишле Упрдор «Кавказны» сапариши бла 2020 жылда башланып бардырыладыла. Эки ызлы жолда улоуланы кёп жюрюгенлери къымылдауну къыйын эте эди, суткагъа 25 мингнге дери автомобиль тирилик болгъанды. Тынгылы ремонт бардырылгъаныны эсебинде аны кенглиги 2-ден 4 ызгъа дери кенгергенди, улоу-хайырланыу халлары да тапландырылгъандыла. Жолну баш къатысын жарашдыргъан заманда ишчиле шёндюгюлю жангы материалланы – кёп жылланы бузулмай турлукъ щебёнка-мастика асфальтобетон къошулманы – хайырланнгандыла. Жолну жюрюу кесеги эки кере чакълы бирге кёбейгенди – 7,5 метрден 14 метрге дери.

Аргудан элни тийреси бла озгъан кесегинде жолда жюрюуню къоркъуусузлугъун игилендирирча 3 километрде жарыкълыкъ ызла жангыртылгъандыла, машинала жюрюген 4,7 километр кесекни узунлугъунда тротуарла бардыла, жаяу жюрюгенлеге таплыкъгъа энчи чеклеуле салыныпдыла. 5 автобус остановка къуралгъанды, пандуслада зыбыр плитка салыннганды, габионладан 188 метр узунлугъу бла къабыргъала ишленнгендиле.

Андан сора да, тынгылы ремонтну чеклеринде 4,2 километр темир чеклеуле, таууш этип белги берген столбчукъла, 450 жол белгиле орнатылгъандыла. 3 кёпюрде жолну тар болгъан кесегине жете тургъан жерлеринде энчи тауушлу ызла жарашдырылыпдыла, суу кетген быргъыла алышындырылгъандыла, кёнделен жол сызла тартылгъандыла. 

Поделиться: