Казбек Коков Черек районну администрациясыны башчысы бла тюбешгенди

Казбек Коков Черек районну администрациясыны башчысы Къулбайланы  Алан  бла тюбешгенди, деп билдиргендиле республиканы оноучусуну пресс-службасындан.

 Муниципалитетни таматасы республиканы оноучусуна районда социал-экономика болумну юсюнден айтханды. Районнга  керекли магъаналы соруула сюзюлгендиле, келир жылгъа борчланы юсюнден сёлешиннгенди.

 -Быйыл кёп иш этилгенди, алай суу бла жалчытыу соруула алыкъа къаладыла. Къашхатау-Аушигер суу баргъан ыз хайырланыргъа берилгенликге, ол азлыкъ этеди, энтта Къара-Суу- Къашхатау суу ызны тартыргъа керекди. Аны бла байламлы проект -смета къагъытла  хазырдыла, экспертизаны ётюп бошагъанбыз, -дегенди Къулбайланы Алан.

Ол дагъыда айтылгъан планланы тамамларгъа иги кесек ахча керек болгъанын билдиргенди.

Казбек Коков айтханнга кёре, сагъынылгъан объектлени федерал программагъа къошарча онгла изленирикдиле.

 Андан сора «Чирик кёл» турист комплексни айнытыуну юсюнден соруу сюзюлгенди, шёндю анда къонакъ алыу юйле, ресторанла, спорт эм сабий майданла жетишимли ишлейдиле.

Районну таматасы билдиргеннге кёре, Чирик кёлню тийресинде  эм Огъары Малкъарда курортну айнытыргъа инвестициялы мастер- план жарашдырыла турады. 

Казбек Коков жер-жерли администрацияны башчысыны башламчылыгъына ыразы болгъанды, кёргюзтюлген проектлени жашауда бардырырча болушлукъ этерге онгла къураргъа кереклисин айтханды.

 -Мен оюм этгеннге кёре, Черек районда турист бёлюмню айнытыргъа иги онгла бардыла. Ол районну, саулай Къабарты-Малкъарны да экономикасын айнытыуда  уллу магъананы тутарыкъды. Аны бла байламлы тынгылы уллу туркластер къураргъа къаллай онгла керек  эселе да, энтта бир кере    къарайыкъ»,- дегенди республиканы оноучусу.

Бизни корр.