Казбек Коков Прохладный шахарны башчысы бла тюбешгенди

КъМР-ни Башчысы Казбек Коков Прохладный шахар округну башчысы Вячеслав Архангельский бла ишчи тюбешиу бардыргъанды.

Казбек Коков Прохладный муниципал администрацияны жангы оноучусу бла шахар округну социал-экономика айнытыуну юсюнден сорууланы сюзгенди. Тюбешиуню кезиуюнде Вячеслав Архангельский шахарны суу бла жалчытыу сорууну тамамларгъа кереклисин белгилегенди, нек дегенде, суу баргъан быргъыла эски болгъандыла эм комплексли ремонт этерге керекдиле.

Администрацияны башчысы Казбек Коковха ара водозабордан тебиреп Прохладныйге дери суу келген быргъыланы жангыртыу бла байламлы проектни бергенди. Республиканы оноучусу шахар округну таматасына билдиргенине кёре, келир жылда Прохладный шахарны суу баргъан быргъыларын алышындырыу ишле келир жылда этилликдиле.

Андан сора да школлада къошакъ халда окъуу жерле къурауну юсюнден сёлешингенди. Быйыл кюз артында Прохладный шахар округда 785 окъуу жери болгъан жангы мектепни къурулушу башланнганды. 2022 жылда Прохладныйде энтта да 560 окъуу жери болгъан мектепни ишлеп тебирерикдиле.

Миллет проектлени бла республикалы программаланы бардырыу бла байламлы 9 арбаз эм Свободы орамда бир жамауат жер тапландырылгъанды, шахарны маданият юйюне эм «Бир киши да унутулмагъанды, бир зат да унутулмагъанды» эсгертмеге ремонт этилгенди.  

Республикалы бюджетни ырысхыларына Прохладный шахарны Головко атлы орамында 6 километр узунлугъу болгъан магистраль жолуна ремонт бардырылгъанды. Жолчула асфальтни алышхандыла, жангы чыракъла такъгъандыла, тротуарланы тапландыргъандыла.   

Головко атлы орам бла шахаргъа кириледи, ол тийреледе социал объектле - школла, сабий садла, темир жол вокзал, МФЦ, краеведческий музей, медицина учрежденияла бардыла. Андан сора да Больничный, Почтовый эм Лесной переулоклагъа ремонт этилгенди.

Казбек Коков белгилегеннге кёре, келир жылда Прохладный шахар округну эм аны инфраструктурасын айнытыу ишле андан ары бардырыллыкъдыла. Республиканы Башчысы округну администрациясыны оноучуларыны аллында болумну игилендириу бла байламлы борчла салгъанды, администрацияны оноучуларындан тири ишлерге кереклиси изленеди, аны баш мураты адамланы жашауларын игилендириудю. «Кесибизни жанындан шахар округга битеу керекли болушлукъну этерикбиз», - дегенди Башчы тюбешиуню ахырында.