Жалгъан аракъы сатханы ючюн – жууапха

Россейни МВД-сыны  «Прохладненский» муниципалла аралы бёлюмюню кёргюзтюую бла маркировкасы болмагъан аракъы эм  спирт продукция сатханы ючюн Алтутдан 39-жыллыкъ жашха уголовный иш ачылгъанды. 
 Рейдни кезиуюнде  «Прохладненский» жол патруль службаны, экономика къоркъуусузлукъну жалчытыу эмда коррупциягъа къажау  управленияны бла  ФСБ-ны  келечилери «Прохладный – Бахсан – Элбрус» жолда женгил машинаны тохтатхандыла. Аны ичин  тинтип  къарагъанларында,  энчи маркасыз 624 аракъы шеша, тюрлю-тюрлю этикеткала,  пластикден бешлитрлик орунлада 150 литр чакълы спирт табылгъанды. Тутулгъан жаш, аны  кесине алып баргъанын айтханды.   
Экспертиза этилгенде, аракъыны градусу,  органолептика эм химия жаны бла да  ГОСТ-ха келишмегени билиннгенди. Продукцияны багъасы уа  200 минг сомдан асламгъа жетгенди.     
Ачыкъланнган шартлагъа кёре, аманлыкъчыгъа РФ-ни  Уголовный кодексини 171-чи статьясыны 1-чи кесегине тийишлиликде терслеу иш жарашдырылып, сюдню  къараууна  берилгенди. 

Поделиться: