Регионланы айнытыу правительстволу комиссияны жыйылыуу болгъанды

Казбек Коков Регионланы айнытыу жаны бла правительстволу комиссияны президиумуну жыйылыууна къатышханды, деп билдиргендиле республиканы оноучусуну пресс-службасындан.

 КъМР-ни Башчысы Казбек Коков Россей Федерацияны Правительствосуну Председателини орунбасары Марат Хуснуллинни башчылыгъында бардырылгъан РФ-де Регионланы айнытыу правительстволу комиссияны жыйылыууну президиумуна къатышханды.

Тюбешиуню ача, Марат Хуснуллин тийишли законопроектни Къырыл думаны депутатлары ючюнчю окъулуунда къабыл этгенлерин  билдиргенди, анда юридический лицолагъа ёнкюч ахчаланы бериуню тизмеси белгиленнгенди.  Ырысхыла Миллет фонддан алынып коммунал инфраструктураны айнытыргъа, къырал эм муниципал предприятиялагъа берилликдиле.

Вице-премьер айтханнга кёре, башда сагъынылгъан жумушлагъа деп 150 миллиард сом белгиленнгенди. Аны бла байламлы Правительство жууукъ заманда право бла байламлы битеу  керекли норматив къагъытланы жарашдырлыкъды эм регионланы оноучуларына къысха заманда тийишли заявкаланы хазыр этерге чакъыргъанды.

Жыйылыууда сюзюлген темаладан бири, 2021-2022 жыллада юйлеге жылыу бериу кезиу къалай баргъанына къаралгъанды. Жангы жыл эм Рождество бла байламлы байрамла жууукълаша келгенлери себепли, вице -премьер регионланы башчыларына жашау коммунал мюлкде жумушла чырмаусуз ётерча кереклисин эсертгенди.

Сюзюлген сорууну юсюнден айта, вице премьер жашау-коммунал мюлкде болгъан тюрлениулени билдиргенди. Ала адамлагъа таплыкъгъа эм жашау фондха къыйматлы оноу этерча деп  бардырыладыла.

Юйледе жылыу  бериу кезиу къалай бардырылгъаныны юсюнден РФ-ни къурулуш эм жашау-коммунал мюлк министри Ирек Файзуллин доклад этгенди.  Ол билдиргеннге кёре, къыралны битеу регионларында юйлеге жылыу бериу кезиу тийишлисича бардырылады, электроэнергетика бла эм коммунал иш бла байламлы битеу жууаплы службала тохташдырылгъан мардалагъа кёре ишлейдиле.  Субъектледе юйлеге жылыу бериу кезиу къалай баргъаныны юсюнден Къабарты-Малкъар Республиканы Башчысы Казбек Коков бла  и Липецк  областны губернатору Игорь Артамонов айтхандыла.

Къабарты-Малкъарда республиканы оноучусу Казбек Коковну буюруу бла юйлеге отлукъ берген кезиу бир кесек алгъаракъ 30-чу сентябрьде башланнган эди.

2021-2022 жыллада кюз эм къыш кезиулени ётерге деп жарашдырылгъан хазырлыкъны паспортуна кёре,  жашау журт эм коммунал-мюлк комплекс коммиссиялы къарауланы ётгендиле эм ишге хазыр болгъандыла. Республикада юйлеге жылыу бериу кезиу тийишлисича бардырылады.

Бизни корр.