Юч республиканы жюз жыллыкъ байрам кюнлерин белгилеу бла байламлы келишим этилгенди

Къабарты-Малкъар, Ставрополь край, Къарачай-Черкес  эм Адыгея республика къыраллыкъларыны жюз жыллыкъ байрам кюнлерин белгилеу бла байламлы келишим этгендиле.

Тюнене Черкеск шахарда Къабарты-Малкъар Республиканы Башчысы Казбек Коков, Къарачай-Черкес Республиканы Башчысы Темрезланы Рашид, Адыгея Республиканы Башчысы  Мурат Кумпилов,  Ставрополь крайны Губернатору   Владимир Владимиров  байламлыкъла жюрютюуню юсюнден келишимге къол салгъандыла эм Къабарты-Малкъар, Къарачай-Черкес эм Адыгея республикала къуралгъанлы 100-жыллыкъ байрамларын белгилеу бла байламлы мероприятияланы бардырыуда, ол ишлени бирлешип ётдюрюрге келишгендиле.

Тюбешиуню ача, КъЧР-ни Башчысы Темрезланы Рашид былай айтханды: «Къарачай-Черкесге келгенигиз бла барыгъызгъа да уллу салам айтама. Бизни регионланы  кёп ёмюрлени бирге келген тарыхдан сора да, шуёхлукъ, бир-бирлерибиз бла жылы шуёх байламлыкъла жюрюту  эм мамыр хоншулукъ бирикдиреди. Тарыхда кёп кере болгъанды, биз бир-бирлерибизге болушлукъ этген эм биргелей къыйынлыкъладан къутулгъан кезиуле, биргелей хорламларыбызгъа эм жетишимлерибизге  къууаннганбыз. Ма ол бирликдеди къыралны  кючю эм хар регионну, энчи алып айтханда».

Келишимни этген кезиуде Казбек Коков къонакъланы алгъаны ючюн, Темрезланы Рашидге ыразылыгъын билдиргенди: «Бек алгъа Рашид Бориспиевичге мында быллай тюбешиу къурагъаны ючюн ыразылыгъымы билдирирге сюеме, быллай форматда бизни халкъларыбызны эм регионларыбызны юсюнден магъаналы  ушакъ бардырыргъа.

Белгилерчады, бу тюбешиу 2022 жылны аллында бардырылгъанын, ол кезиуде  юч республика жюз жыллыкъ юбилейлерин белгилерикди. Къабарты-Малкъарны, Къарачай-Черкесни эм Адыгеяны халкъларыны къадарларында боллукъ юбилейни магъанасын жаш тёлюге жетдириуню бизни сыйлы борчубузгъа санайма. Байрамла бла байламлы кёп тюрлю къууанч мероприятияла белгиленнгендиле, ышанама, ала барысы да къарындаш республикаланы келечилери бла бирге бардырыллыкъларына.

Бирге сюзерча кёп тюрлю соруула бардыла, ала билим бериу бла, туризмни айнытыу бла эм уллу проектлени бирге бардырыу бла байламлыдыла. «Байламлыкъланы юсюнден айтханда, ала бизни къарындаш халкъланы арасында, тёрели халда къуралгъандыла. Чыгъармачылыкъ коллективлени, маданиятны келечилерини байламлыкълары жылдан-жылгъа кючлене барадыла.

Экономиканы эл мюлк бёлюмюнде бирге бардыргъан проектле, туризмни айнытыу.   Билим бериу проектлени да бирге бардырабыз,  IT-технологиялада, математикада Адыгеяны иги жетишимлери барды, аланы сынамларын энди биз алабыз.

Бизни байламлыкъларыбыз юзюллюк тюйюлдюле. Уллу деменгили къыралыбыз болгъан къадарда, анда жашагъан халкъла, бирликде болуп, алгъа бирге барсала», - деп  чертгенди республиканы оноучусу Казбек Коков. Тюбешиуню ахырында Казбек Коков  Темрезланы Рашидге Къарачай-Черкесни халкъыны аллында тургъан борчланы тамамлауда жетишим тежегенди.

Ол кюн окъуна  Шимал-Кавказ федерал округну субъектлерини оноучулары Къарачай-Черкес Республиканы Суратлау галереяны музей-заповеднигине баргъандыла, КъЧР-ни жюз жыллыкъ юбилейине жораланнган кёрмюч бла шагъыйрейленнгендиле. Кёрмючде республиканы халкъларыны маданият хазналарыны тюрлюлюгюн кёргюзтген суратла, Байрамукъланы Х.Б. атлы миллет библиотеканы эски китаплары, Россейни регионларыны суратчыларыны сейирлик ишлери бардыла.