Жарыкъ жолла - къоркъуусузлукъну себеби

КъМР-ни Транспорт эмда жол мюлк министерствосу «Къоркъуусуз эм тынгылы автомобиль жолла» миллет проектни чеклеринде аслам жумуш тамамлайды. Тынгылы ремонт ишле бла бирге, жолла кече жарыкъ болурча мадар да этиледи. 

Къырал автоинспекцияны управлениясындан билдиргенлерине кёре, жоллада чыракъла бла чыпынла салыннганларыны хайырындан озгъан жети айда республикада кечеги авариялада ёлгенлени саны былтырдан оналты процентге азайгъанды.  

Проект бла федерал трассаладан эм регион магъаналы жолладан сора да, эллени ичлеринде да чыракълары бла чыпынла орнатыладыла.  Юч жылны ичинде отуз элде, неда 130 километрде, ток ызла жарашдырылгъандыла. Саулай алып айтханда, келир заманда   580 километр чакълы бирде жарыкълыкъ болурча мадар этилликди. Эсге сала айтсакъ, былтыр жарытыу система   40 километрде тартылгъанды. 

Быйыл планнга кёре тийишли ишле 60 километрде бардырылгъандыла.  Алай бла Хасания, Акъ-Суу, Кёнделен, Яникой, Камлюково, Кишпек, Куба, Приречное, Экинчи Чегем элледе, Чегем шахарда эм Нальчикни къыйыр районларында жолла кече жарыкъ боллукъдула. Бусагъатда аланы кёбюсюнде чыракълары бла темир чыпынла орнатылып бошалгъандыла.  Энди ызланы ток бла жалчытыу жаны бла жумушла тамамлана турадыла.