«Хал бир кесек игиленнгенди, алай дарман салыуну селейтирге жарарыкъ тюйюлдю»

КъМР-ни Башчысы Казбек Коков  «муниципал сагъатны» бардыргъанды. Анга КъМР-ни Правительствосуну Председатели Мусукланы Алий, КъМР-ни Башчысыны Администрациясыны таматасы Мухамед Кодзоков, муниципал къуралыуланы бла шахар округланы администрацияларыны башчылары къатышхандыла. 

Кенгешде муниципалитетледе  миллет проектлеге кёре белгиленнген ишле къалай толтурулгъанларыны юсюнден сёлешиннгенди.  Сёз «Жолла», «Шахарда тап болумла къурау», «Жашау этерге жарамагъан журтланы азайтыу», «Маданият», «Хар сабийни жетишими», «Жашау журтла», «Таза суу» регион проектлени юслеринден барады. Жыйылыуда айтылгъаннга кёре, битеу белгиленнген проектле толтурулгъандыла. 

Республиканы Башчысы автомобиль жолланы жанларында къурулушла бардырыугъа, ол санда машиналаны отлукъ бла жалчытыучу станцияланы ишлеуге эс бурургъа кереклисин айтханды эмда бу ишни тап халгъа келтирирге буюргъанды. 

Эпидемиология болумгъа алгъынча уллу эс бурулады. Казбек Коков ауругъанланы эмда госпитальлагъа тюшгенлени саны азая баргъанын билдиргенди. Къоркъуулу жукъгъан аурууладан бакъгъан эки госпиталь жабылгъанды – Чегем эмда Терк районланы ара больницаларында. «Бюгюнлюкде 5 госпитальда 884 саусузгъа багъадыла, 1110 ундурукъ барды. Бир ай мындан алгъа  7 госпитальда 1500-ден артыкъ ундурукъдан бир бошу жокъ эди»,- дегенди ол.

Къабарты-Малкъарны оноучусу саулай къыралда да ауругъанланы саны азая баргъанын эсгертип, алай специалистле хал алыкъа тохташмагъанын, жангы штамм жайыла баргъанын эсгертедиле, деп къошханды. «Бизни республикада болум игилей сакъланса, чек салыу мадарла  жумушатылыргъа боллукъдула. Аны сагъышын специалистле бла бирге эте турабыз. Алай дарман салыуну арталлыда селейтирге жарарыкъ тюйюлдю, профилактика мадарла къалай сакъланнганларына да контроль этилирге керекди»,- деп чертгенди  Казбек Коков.