Пенсиягъыз къыралныкъы болмагъан фондха кёчюрюлген эсе

Ахыр заманда кёплеге «Сизни пенсиягъыз Къыралныкъы болмагъан пенсия фондда жыйылады» деген жазыулары бла письмола келип башлагъандыла. Алай сиз кесигиз аны юсюнден заявление жазмагъан эсегиз, былайда аманлыкъчыла да ишлегендиле деген къоркъуу барды, деп билдиредиле РФ-ни Пенсия фондуну республикада бёлюмюню пресс-службасындан.

 

Аллай болумгъа тюшген эсегиз, фондну жер-жерли бёлюмюне, аллай онг жокъ эсе уа, кесигиз ол заманда тургъан жерде бёлюмюне барып, специалист бла сёлешигиз. Ол сизге ахчаны артха къалай ётдюрюрге кереклисин, къаллай эркинликлеригиз болгъанын айтырыкъды. 

Андан тышында, ётдюрюлген фондха барыргъа жарарыкъды. Анда сизге пенсиягъыз алада къалай бла жыйылгъанын ангылатыргъа эмда заявленияны кёргюзтюрге керекдиле. Сиз аны жалгъан суна эсегиз неда анга къайда эм къачан къол салгъаныгъызны билмей эсегиз, претензия жазаргъа эркинсиз. Анга тарыгъыуну фондха Интернет бла неда почта бла (адреси: Москва, Шаболовка атлы орам, 4, Гражданланы жумушлары бла ишлеу жаны бла управление) иерге боллукъду. Былайда «исси» телефоннга сёлешиу да болушурукъду, аны номери 8-800-510-55-55. Анда сизге андан ары не этерге кереклисин да билдирликдиле. 

Болсада жарсыргъа керек тюйюлдю. Ахчагъыз пенсияны борчлу халда страхование этиу системада энчи счётугъузда сакъланырыкъды. Аны артха къырал фондха къайтарыргъа сюе эсегиз а, 31-чи декабрьдан кеч къалмай аны жер-жерли бёлюмюне барып, заявление жазаргъа керексиз.

Эсгертиу: сиз 1967 эм аны ызындан жыллада туугъан эсегиз, страховой тёлеулени пенсияны накопительный кесегине бёлмей, страховой кесегине къояргъа боллукъсуз. Ары дери жыйылгъан ахча пенсиягъа чыкъгъаныгъызда толусунлай тёленирикди. Аны ючюн заявление жазаргъа керекди.

Энди уа ахчагъыз сизден жашырынлыкъда къыралныкъы болмагъан пенсия фондха къалай ётдюрюлгенине къарайыкъ:

1. Сизге ишигизге неда юйюгюзге окъуна аллай фондланы агентлери келип (ала кёбюсюнде къайдан болгъанларын шарт айтмаучудула), законодательствода болмагъан бегимлеге тюшюндере, пенсиягъа жыйылгъан ахчагъызны мычымай алагъа кёчюрюрюгюзню излейдиле. Ала айтханнга кёре, алай этмесегиз ала «кюерикдиле». (Кёп болмай бизни редакциягъа да келген эди аллай агент.-авт.)

Не этерге керекди? Бек алгъа - танымагъан адамлагъа эшиклени ачмазгъа. Ишигизге келген эселе, берген документлерине къол салмагъыз. Къадалып къоймай эселе, полицияны чакъырыгъыз. Эсигизде болсун: Россейни Пенсия фондуну ишчилери алай этип айланмайдыла, сора ол жыйылгъан ахча бир жары да тас боллукъ тюйюлдю. 

2. Кёп тюкенледе, пенсия ахчаны къыралныкъы болмагъан фондха ётдюрмесегиз, юй техниканы кредитге берирге унамайдыла. Сылтаугъа уа кредитни ансыз терк жарашдырыргъа жарарыкъ тюйюлдю, дейдиле. Алай айтмасала да, алада сатыу-алыудан сора аллай фондладан письмола келип башлайдыла. Нек? Кредит этгенде, алада сизни документлеригизни копиялары къаладыла, ол санда къол ызыгъыз да. Аманлыкъчылагъа аланы кеслерине таплыкъгъа хайырланыргъа, кесигиз ангылагъандан, къыйын тюйюлдю.

Не этерге керекди? Ахчаны ётдюрмей, кредит бермей эселе, эм игиси – бу жумушланы тамамларгъа башха организацияны табыгъыз. Онг бар эсе, документлени копияларын алада къоймазгъа кюрешигиз. Болсада, ахчагъыз башха жерге сиз билмей ётдюрюлген эсе, болжалгъа салмай, Пенсия фондха барыгъыз эмда бу ишни юсюнден право сакълагъан органлагъа билдиригиз.

3. Кредит неда абери сатып алгъанда аманлыкъчыла ахчаны ётдюрюуню юсюнден келишимге кирген къагътланы барысын да бермейдиле. Ала бирси документле бла бирге аны экинчи бетине къол салдырадыла, биринчиси уа арада къалады. Сиз анга къол салгъандан сора, биринчи бети бла жабышдырылады эм керекли жерге ийиледи.

Не этерге керекди? Хар берилген документни ашыкъмай окъугъуз, неге къол салгъаныгъызгъа эчи эс буругъуз. Жангыз да эслилик сакъларыкъды аман болумдан.

4. Иш излей кёпле болушлукъну тийишли агентстволадан тилейдиле. Алай къоркъуу алада да сакълайды. Биринчиден, сизге ахчаны ётдюрюуню юсюнден келишимни башха документле бла бирге «сугъаргъа» боллукъдула. Экинчиден, кредит алгъандача сылтауну айтыргъа да угъай дерик тюйюлдюле. Къалай-алай болса да, ала иш табаргъа болушмазлыкълары хакъды, нек дегенде аланы муратлары башхады.

Не этерге керекди? Башында айтылгъаныча, эсли болургъа. Бир заманда да документни иги тинтмегенлей, анга къол сала турмагъыз, ким да берсин сизге аны. Ахчаны кёчюрмей иш бла жалчыталлыкъ тюйюлбюз дей эселе уа, башха агентствогъа барыгъыз.

Кульчаланы Зульфия.
Поделиться: