Фахмулу актёр, кёпле сюйген адам

Бир талай жыл мындан алгъа  мен Франциягъа барама.  Парижни орамлары бла  бара, хар тюкенни терезесинде  айтхылыкъ  французлу актёр Ален Делонну суратын кёрюрге боллукъ эди.  Ол шартха эс бура,  жерлешлери нечик бек сюедиле бу актёрну деригин келе эди. Керти да ол алай болгъанды. Быйыл ноябрь айда  ол кесини 86 жыллыгъын белгилегенди. Кечирек болса да, аны  атын дагъыда бир сагъыныу артыкълыкъ этерик болмаз.

Ален Делон, толу аты – Алек Фабьен  Морис  Марсель  Делон,  «Двое в городе», «Смерть негодяя», «Самурай», «Неукротимый», «За шкуру полицейского», «Наша история», «Мелодия подземелья», «Когда вмешивается женщина» деген эмда башха фильмле бла  атын кенг айтдыргъанды. Махтауну, жетишимни бек бийиклерине чыкъгъанды.

Бийик ёсюмлю, болмагъанча чырайлы актёрну режиссёрла фильмлеринде  алдырыргъа  сюйюп чакъыргъандыла. Сейир тюйюлмюдю, тийишли билими болмагъан жаш адам ишинде алай айырмалы болалгъаны, жетишимни аллай бийигине чыгъалгъанды да? Бютюнда ата-ана жылыуундан эртте айырылгъан, юйюрюнде ёсмеген жаш адамгъа ол сейир тюйюлмюдю?

Алек  Делон Парижден узакъ болмагъан Со деген жерде туугъанды. Атасы кинотеатрны директору эди, анасы уа аптекада ишлегенди. Жашлары гитчечик эди ала айырылгъанда. Аленнге уа аланы юйлеринде аш-суу этген, тизгинлерин жыйыучу тиширыу къарагъанды.

Мектепде да иги окъумагъанды, аны себепли орамгъа къысталып къалмасын деп, жашчыкъны башха школлагъа кёчюре тургъандыла.  Ол училищеде да эки жыл окъуйду. Ызы бла юч жылны аскерде къуллукъ этеди – тенгиз флотда. Парижге уа  жыйырмажыллыкъ жашлай къайтады. Нёгери бла бир отоугъа  хакъ тёлеп, ишге киреди: орамда газетлени сатады, официант да болады… Актёрла Брижит Обер, Бриали, Бельмандо бла танышады. Ол кезиуде, жаш болса да, белгили актёр эди Жан-Клод Бриали. Ма ол келтиреди Делонну кинематографха. Режиссёр Ива Аллегре шуёху эди Бриалини. Аны тилеги бла Аллегре «Тиширыу къатыша эсе…» деген фильмге Делонну чакъырады. Ролю гитче болгъанлыкъгъа, аны эслейдиле эм режиссёрла бир бири ызындан кеслери алдыргъан кинолагъа чакъырадыла.

«Кристина» деген фильм а аны къадарында энчи жерни алады. Мында ол немисли актриса Роми Шнайдер бла танышады. Ала бир бирлерин сюедиле, аны себепли Шнайдер Парижде къалады. Германиягъа  кетмейди. Ала бир юйюрлю боллукъларына бир  адам  да ишекли тюйюл эди. Алай актёрну иши алайды-  съёмкала бирде - Парижде, бирде уа Римде  боладыла.  Делон а  артыкъ ашыкъмай эди тойларын этерге. Алай бла экиси да башха къыраллада бардырылгъан съёмкалагъа чачылышадыла. Ма ол кезиуде Делон Натали Бартельми бла танышады. Ол  сурат алыучу эди. Бир ненча айдан а Роми Шнайдер газетледен биледи ала бир юйюр къурагъанларын.

1964 жылда Делон «Дельбо Продюксьон» деген кинокомпаниясын ачады. Алай а бир жылдан, иши бармай, аны жабаргъа тюшеди.

Ален Делонну Голливудха чакъырадыла. Аны биринчи жашы Антони да мында тууады. Актёр бир ненча фильмде ойнагъандан сора, Европагъа къайтады.  Режиссёрла анга дайым бир тюрлю  рольланы бергендиле –тюйющ- уруш, ушкокдан атдырыу,  аманлыкъчыланы машиналада  бла бир бирни къуугъан. Къараучу аллай Делонну кёрюрге сюе эди. Актёр а башха рольланы кюсей эди… Ол кезиуде Делон юйдегиси Натали бла айырылады. Жангы  фильмде уа аны биргесине Роми Шнайдер ойнасын деп къаты болады. Шнайдер а, не ишин да къоюп, Делон  болгъан жерге учуп,  мычымай жетип тургъанды. Алай Делон а аны бла жашауун байламагъанды. Тиширыуланы алышындыра, элли эки жыллыгъына дери  юйленмегенди. 1987  жылда уа Розали ван Бремен бла  танышады, аны бла бир юйюр къурайды. Алагъа эки сабий да тууады – къызы Аннушка бла жашы Ален –Фабьен.

Кинода Ален Делон ойнайды – хар биринде кеси жашауун жашагъанды. Ариу сыфаты да аны уллу жетишимине себеплик эте келгенди. «Адель-фильм» кинокомпаниясы бла да иши онглу  бола башлайды.

Жулдузлу актёрну жашауу сыйдам болмагъанды. Жашы Антони бла, белгили актёр Жан-Поль Бельмондо бла, айтхылыкъ режиссёр Лукино Висконти эм башхала бла да  къаугъалы  бола келгенди. Бирсиле бла терк жарашханды, жаланда Бельмондо бла отуз жылны ичинде бир кере да ойнамагъанды, сёлешген да этмегенди.

Кино бла чекленмейди актёрну жетишими. Францияны президенти Франсуа Миттеранны къолундан бийик къырал саугъаны алгъанды. Канныде баргъан кинофестивальда да аны бир кере белгилеп къоймагъандыла. Этген ахчасын да хайырлана билгенди.  Ол «Трансъюнити» деген авиакомпанияны иесиди, мебель этген фабрикасы барды. Ич кийим сатхан бир талай тюкенлери, «Ален Делон» деген духлары да анга уллу хайыр келтиредиле. Орлеанны къатында кёп жери, Парижде уа бек  ариу  фатары бардыла. Уллу ат орундагъы атлары уа, чаришлеге къатышып, алчы жерлени алып, аны бла иелерине хайыр келтиредиле.

- Он жыл мындан алгъа уа ол былай дегенди: «Къыркъ жылны сахнада, политикада, башха ишде болсун, кюрешдинг эсе, кетерге керексе».

1999 жылда ол Швейцарияны гражданини болады, Шен-Буржи деген жерде юй алгъанды. Экинчи юйдегиси Розали бла да айырылып, жангызлай жашайды. «Мен жангызлыкъдан бир заманда да къутулмагъанма. Адамны жюрегин ол сезим гитчелигинден бийлеген эсе, анга бир киши да болушаллыкъ тюйюлдю»,-дейди ол.

Бусагъатда Ален Делон  жашаууну аслам кесегин  Швейцарияда вилласында  ётдюреди. Аны граждан юй бийчеси   Мирей Дарк 2017 жылда  ауушханды. Алгъаракъда уа эрттегили шуёху Жан-Поль Бельмондо да дуниясын алышханды. Анга Ален Делон бек уллу ачыу этгенди.                        

Холаланы Марзият.
Поделиться: