«Чегем-парк» ачылыргъа кёп къалмагъанды

Чегем шахарда шахарны айбатландырлыкъ  «Чегем-парк» проект бла байламлы  уллу иш  бардырылады.   Подряд организацияны келечилери объектни графикден кеч къалмай бошар ючюн ахыр жумушланы тамамлап кюрешедиле,- деп билдириледи Чегем муниципал районну администрациясыны  пресс-службасындан.

Бюгюнлюкде жаяу, велосипед  жолчукъла, спорт эм сабий майданла, тематикалы парк тийиреле эм кече жарытырча системада хазыр этилгенди.  Паркны эм сыйлы объектлерине Къулийланы Къайсыннга бла Алим Кешоковха эсгертмени санаргъа боллукъду. Аланы фронтда эм мамыр жашауда  шуёхлукълары ёсе келген тёлюлеге  юлгю болгъанлай къаллыкъды.

«Чегем-парк» проектни бардырыргъа   муниципалитет шахар тийрени игилендириу жаны бла  битеуроссей конкурсда  хорлагъаны ючюн  онг табылгъанды.  Ол конкурс РФ-ни Президенти Владимир Путинни башламчылыгъы бла 2018 жылдан бери бардырылады. Анга биринчи заманлада окъуна  регионлада, муниципалитетледе да аслам эс бургъандыла. Ол себепден аны  «Жашау журт эм шахар болум» миллет проектни чеклеринде тамамларгъа этилгенди.