Жамауат бла ачыкъ ушакъ

Кёп болмай КъМР-ни Транспорт эмда жол мюлк министри  Аслан Дышеков Регионнга оноу этиу арада (ЦУР) тюзюнлей эфирде ведомствону ишини юсюнден хапарлагъанды эм  жамауатны жарсытхан соруулагъа да жууапла бергенди.

Бу жол эфирге  адамла болмагъанча тири къатышхандыла. Алай,  жарсыугъа, министр жаланда  23 соруугъа жууап берирге жетишгенди.

Трансляцияны кезиуюнде Аслан Заурбекович «Къоркъуусуз эмда тынгылы автомобиль  жолла» миллет проект бла байламлы къаллай ишле этилгенлерин айтханды. Аны бла бирге   къыш сууукълагъа хазырланыу къалай баргъаныны  эм жоллада аварияланы санын азайтыр ючюн не  мадарла этилгенлерини юсюнден да билдиргенди.  Андан сора да, келир жылда республиканы  жолларында  этилирге белгиленнген  ишлени да сагъыннганды.    

Министрге  жамауат транспорт бла байламлы соруула да  берилгендиле. Ол санда Чегем бла Черек районланы тау эллерине рейсле жангыдан къачан ачыллыкълары да сорулгъанды. 

Ахырында Аслан Заурбекович озгъан эки жылда Къабарты-Малкъарда беш жюзден аслам жол жангыртылгъанын, мындан арысында да ведомство республиканы жоллары  мардалагъа келиширча  ишлени тири  бардырлыгъын эсге салгъанды.