Прокуратура билдиреди

Сакъат сабийлеге бла аланы биргелерине келгенлеге – энчи онгла

РФ-ни Президентини 2021 жылда 26 июльда чыгъарылгъан 437-чи номерли Указы бла сакъат сабийлени бла аланы биргелерине келгенлени жумушлары тюкенледе, кафеледе, ресторанлада, поликлиникалада, больницалада, сабий садлада бла школлада биринчи болуп тамамланыладыла. Дагъыда жашау жумушла бла жалчытыучу юйледе, связьны, ЖКХ-ны, юридический службаланы объектлеринде, башха организациялада да аланы алгъа жиберирге тийишлиди.

Андан сора да, сакъат сабийле организацияланы бла предприятияланы оноучуларына, башха къуллукъчуларына приёмгъа да биринчи болуп ётедиле.

Тюзетиуле  РФ-ни Президентини «Инвалидлеге къырал болушлукъну къошакъ мадарларыны юсюнден» 1992 жылны 2 октябринде чыгъарылгъан 1157-чи номерли Указыны 1 пунктуну 7 абзацына да кийирилгендиле. Ары дери очередьсиз ётерге жаланда 1-чи эмда 2-чи группалы инвалидлени эркинликлери болгъанды. 

Указда кёргюзтюлген онгладан сора да, сакъат сабийле сабий садлада, медицина учреждениялада бла санаторийледе жерле бла бек алгъа жалчытылынадыла.  Аталарындан, аналарындан бири къыяулу болгъан сабийлеге да тюз да ма аллай онгла бериледиле.

«Россей Федерацияда сакъатланы социал къоруулауну юсюнден» 1995 жылда 24 ноябрьде чыгъарылгъан 181-ФЗ номерли Федерал законну болумларына кёре, шахар башчыладан сакъат сабийле бла аланы биргелерине жюрюген адамла транспортха, поликлиникалагъа, школлагъа, сабий садлагъа, башха социал объектлеге, жашау юйлеге чырмаусуз ётерча этерге, ол санда пандусла, къол тутхучла салынырларын, билдириуле Брайль харфла бла да жазылырларын жалчытыргъа борчлудула.

         Жер юлюш сатып алгъаннга налогну бир кесеги къайтарыламыды?

Россей Федерацияны Налог кодекси бла Россейни жеринде жашау юйле эмда ала орналгъан жер юлюшле сатып алыугъа этилген къоранчла ючюн ырысхы налогну бир кесеги къайтарылады.  РФ-ни Налог кодексини 220-чы статьясыны 3-чю кесегинде жазылгъаныча, этилген къоранчны къайтарыр ючюн, жашау юйню сатып алгъан адам аны юсюнден келишимни, жер юлюш эмда анда орналгъан жашау журт аны иелигинде болгъанына шагъатлыкъ этген документлени кёргюзтюрге керекди.

Налог тёлеучю бахчачыланы биригиулеринде юйчюк алып, артда ол жашау журтха саналгъан эсе, Россейни Федерал налог службасы кесини 2021 жылны 15 июлунда жарашдыргъан письмосунда ангылатханыча, налог тёлеучюню НДФЛ-ге кёре налогну бир кесегин алыргъа эркинлиги жокъду. Нек дегенде ол юйню жашау журтнуча сатып алмагъанды.

Россей Федерацияны Конституция сюдюню 2021 жылны 6 июлунда чыгъарылгъан 1164-О номерли болуму бла былай тохташдырылады: налогну бир кесегин къайтарыуну мардалары инсанланы жашау журтла ишлерге, сатып алыргъа кёллендирир мурат бла тохташдырылгъандыла.