Миллет проектле къалай толтурулгъанларына къаралгъанды эмда ол ишни игилендириу жаны бла мадарла сюзюлгендиле

Пятигорск шахарда Юрий Чайканы башчылыгъы бла РФ-ни Президентини СКФО-да толу эркинликли келечисинде советни кезиулю жыйылыуу ётгенди. Анда округну субъектлеринде миллет проектле къалай толтурулгъанларына къаралгъанды эмда ол ишни игилендириу жаны бла мадарла сюзюлгендиле.

Кенгешге КъМР-ни Башчысы Казбек Коков, РФ-ни Къырал Думасыны Председателини орунбасары Ольга Тимофеева, РФ-ни къурулуш эмда ЖКХ министрини орунбасары Сергей Музыченко, РФ-ни Правительствосуну проект ишини департаментини таматасы Юлия Левитская, жамауат бла байламлыкъланы эмда коммуникацияланы бёлюмюнде цифралы проектлени толтуруу жаны бла автоном коммерциялы болмагъан «Диалог» организацияны директору Владимир Табак къатышхандыла

Жыйылыуда быллай шартла туура этилгендиле: 2021 жылда округну субъектлерине миллет проектлени толтуруугъа битеу да 107,5 миллиард сом жиберилгенди. Аладан 94 процентине кёре келишимле этилгендиле (былтыр а -83 процент).  Ол ахчаны 70,5 проценти хайырланылгъанды (ол да былтырдан асламды (69 процент), алай къыралны башха субъектлеринден эсе азды (73 процент).  СКФО-ну субъектлерини асламысы ол кёрюмдюге жете келгендиле (67-88 проценнт).

Кесини оюмун айта, къырал башчыны округда келечиси Юрий Чайка  2021 жылда миллет проектлени толтурууну эсеплери округну регионларыны асламысында, артыкъда Чечен Республикада бла Къабарты-Малкъарда, иги болгъанларын чертгенди.

Къабарты-Малкъарда миллет проектлеге кёре 47 регион программа жарашдырылгъанды. Алагъа битеу да 2019-2024 жыллада 35 миллиард сомдан аслам къоратыргъа белгиленеди.  Быйыл 8,5 миллиард сомгъа 41 регион проектни толтурургъа мурат этиледи.  88 объектни ишлерге эмда жангыртыргъа белгиленнген эди да, аладан 63-сю тамамланнганды.

Сёз жангы школланы бла сабий садланы, маданият юйлени бла китапханаланы, спорт залланы бла сабий майданчыкъланы, тапландырылгъан тийрелени бла инфраструктура объектлени юслеринден барады. Быйылны 1 декабрине регион проектлеге бёлюннген ахчаны 86,7 проценти хайырланнганды.

РФ-ни Президентини СКФО-да толу эркинликли келечисини себеплиги бла Нальчикде онкология диспансерни, жаш тёлюню чыгъармачылыгъыны юйюню къурулушларын, Бахсанда суу ызланы тартыу жаны бла ишни ахырына жетдириу жаны бла амалла этилгендиле. Нальчикде биринчи поликлиниканы мекямы тынгылы ремонт этиуню федерал программасына кийирилгенди.

Жыйылыуда РФ-ни Президентини Регионлагъа оноу этиуню араларын къурау жаны бла буйругъу къалай тодлтурулгъанына да къаралгъанды. Аны юсюнден айта, полпред Север-Кавказ федерал округда ол тамамланнганын чертгенди.

-Аллай арала округну битеу субъектлеринде ачылгъандыла. Ала  оноу этиуню регион системасына толусунлай келишедиле, муниципалитетлени араларында байламлыкъланы амалларын жарашдыргъандыла, ишлерин тири бардырадыла,- дегенди Юрий Чайка.

Ол дагъыда аны башламчылыгъы бла Пятигорскда округну Россейде биринчи Координация арасы къуралгъанын да билдиргенди. Анда башха регионладан алыннган информациягъа къаралады эмда регион араланы ишлери бирге тийишдириледи. «Къырал информация политиканы жашауда бардырыуну аллай амалын хайырлыгъа санаргъа боллукъду»,- дегенди полпред.

Къабарты-Малкъарда Регионнга оноу этиуню арасы 2020 жылда ноябрьде къуралгъанды. Бир жылны ичинде «Инцидент Менеджмент» системаны юсю бла инсанланы 16 минг тилеклерине бла тарыгъыуларына къаралгъанды.  ЦУР республиканы жамауатыны жарашдырылгъан обращенияларын  жарашдырыуну саны бла, инсанланы сорууларына терк да тынгылы да жууапла бериу бла къыралда биринчи жерни алгъанлай келеди.

Поделиться: