Шуёхлукъну, чомартлыкъны, насыпны да байрамы

Бу кюнледе «Ариулукъ эм чомартлыкъ дунияны палахдан къутхарырла» деген проектге кёре «Нальчик - насыпны  налы»  деген 6-чы  халкъла аралы артий конкурс бардырылгъанды. Аны Дуния артий комитетни Шимал Кавказда представительствосу къурагъанды. Ол кеси да   2019 жылда ЮНЕСКО-ну программасына  киргенди. Анга Россейни кёп регионларындан сора да, Абхазиядан, Армениядан,  Африкадан , Египетден, Индиядан, Пакистандан, Сириядан, Туркменистандан да  чыгъармачы  коллективле эм жырчыла къатышхандыла.

Аны ачылыуунда  Дуния артий комитетни вице-президенти Ауес Бетуганов конкурс халкъланы араларында шуёх байламлыкъланы кючлендирир, бир бирни  миллет культураларын, адет-тёрелерин иги билирча этер муратда бардырылгъанын чертгенди.  
Жюриге сайлау этерге артыкъ тынч болмагъанды.  Жырлагъанла, тепсегенле, тюрлю-тюрлю инструментлени сокъгъанла, назмула айтханла, моданы кёргюзтгенле да усталыкъларын аямагъандыла.

Конкурсну кезиуюнде мастер-классла, «тёгерек столла», чыгъармачы лабораторияла, шуёхлукъну ингирлери ётгендиле, Къабарты-Малкъарны айбат жерлерине жолоучулукъла да  болгъандыла. Конкурсха къатышханла уа аны бийик даражада къуралгъанын белгилегендиле. Дагъыстанны делегациясыны башчысы  Николай Бабичев, Адыгеядан  педагогика илмуланы кандидаты  Пелагея Сергеева, Кърымдан  Анастасия Петренко да къурау комитетге , аны башчысы Ауес Бетугановха ыразылыкъларын билдиргендиле, мында тургъан кюнлерин бир заманда да унутмазлыкъларын айтхандыла. 

Ингушетия Республикадан Россейни искусстволарыны сыйлы къуллукъчусу  Фариза Шадыжева уа: «Дуния, адамла да  кёп тюрлю болгъанлыкъгъа, барыбыз да бир юйюрню сабийлерибиз. Ма бу байрам а анга шагъатды», - дегенди.  
Хорлам болдургъанла  аламат гала-концерт  да кёргюзтгендиле. Аны кезиуюнде  алагъа майдалла, лауреатланы дипломлары, сертификатла, бюсюреу письмола да берилгендиле. Кетип бара конкурсантла  республикагъа  энтта келир ючюн  мында жюреклерини бир кесекчиклерин къойгъанларын айтхандыла.