Сёз эпидемилогия болумну эм жууукъ заманлада тамамланырыкъ ишлени юсюнден баргъанды

Инфраструктураны, социал эмда саулукъ сакълау объектлени, жолланы жангыртыу жаны бла келир жыл бютюнда кёп иш этилликди, дегенди Къабарты-Малкъарны Башчысы Казбек Коков  асламлы информация органланы келечилери бла бардыргъан тюбешиуде.

Бюгюн республиканы Правительствосуну юйюнде ётген пресс-конференцияда КъМР-ни Башчысы Казбек Коков кёп тюрлю бёлюмледе иш не халда болгъаныны, чурумланы, келир кезиулеге умутланы юслеринден хапарлагъанды.

Биринчи тема коронавирус ауруу бла байламлы эди. Казбек Валерьевич регионну саулукъ сакълау бёлюмю къалай ишлегенини юсюнден айтханды, кёп болмай кеси да вакцинацияны къайтарып ётгенин билдиргенди. Дагъыда бюгюнлюкге бу ауруугъа къажау прививканы республикада 250 минг адам этдиргенлерин да туура этгенди. «Бир жаны бла асламлы иммунитет къуралгъан чекге жетгенбиз деп айтырча тюйюлдю, алай дагъыда аны хайырындан болум аз-аздан игилене баргъаны уа белгилиди», - деп чертгенди ол.

Тюбешиуде республиканы бюджетини онгларын кючлендириуню, адамланы къолайлыкъларын игилендириуню, миллет проектлени эмда коронавирус бла байламлы чеклениуле алагъа къаллай чырмау салгъанларыны юслеринден да айтылгъанды. Казбек Коков федерал власть структурала бла къыйматлы байламлыкъла къуралгъанларын белгилеп, ишсизликни азайтыу жаны бла кёп зат этилгенин, жангы инвестициялы проектле экономика бла бирге ол бёлюмде болумну да игилендирликлерин чертгенди.

Келир 2022 жылгъа республика кёп ахшы умутла бла кирирге таукелди. Аны айтханда Казбек Валерьевич къадар инфраструктура объектлени къурулушу бардырыллыгъыны, школла, саулукъ сакълау эмда социал магъаналы объектлени жангыртыуну юслеринден сагъыннганды. Аладан сора да жолланы игилендириу, коммунал сетьлени тап халгъа келтириу, таза суу бла жалчытыуда чурумланы кетериу – бу бёлюмледе да къадар иш этилликди.

Республикада эм уллу боллукъ поликлиниканы къурулушу бардырылып башланнганы бу кюнледе, эски юйледе жашагъанланы жангы журтлагъа кёчюрюу проектни тамамлау да тохтарыкъ тюйюлдю. Эрттеден бери жарты ишленип къалгъан Театрланы Дворецини мекямы, халкъны арасында кёп сёзле къозгъагъан «Гидрометаллург» заводну къадары, хауле итлеге ишленирик приют – ала бла байламлы оноула да этилликдиле, деп ышандыргъанды республиканы Башчысы.

Жамауатны транспорт жумушланы бериу сферада излемлерине, шахар къурулуш политика бёлюмде тарыгъыуларына да эс бурулады. Къысха айтханда, келир жылда - сёз ючюн, дегенде, ол Къабарты-Малкъаргъа юбилей жыл боллукъду – республика къайсы тюрлю бёлюмде да жетишимле болдурургъа таукелди. Бу пресс-конференцияны юсюнден толу материал газетибизни  келир номеринде басмаланырыкъды.

Улбашланы Мурат.