Шайырны ёлюмсюз назмулары бюгюн да кёллендиредиле

Хар замандача, октябрьде Малкъар халкъны политика репрессияланы кезиулеринде жоюлгъанларына аталгъан мемориалда «Пока нам хватит силы быть людьми, Мы на земле останемся народом» деген аты бла Мечиланы Кязимни назмуларын окъуу баргъанды. Анга, къысха айтханда, «Кязимни окъуулары» деп аталып къалгъанды Уллу поэтлерибизни акъылман оюмларын эсде тутарча, аллай проектни тарыхчы, жамауат адамы, «Къайсыннга жюз атлам» атлы культура фондну председатели Тетууланы Хадис башлагъан эди иги кесек жыл мындан алгъа. Насыпха, бюгюнледе ол кюч ала барады.

Мемориалны директору Теммоланы Фаризат ол окъууланы бардыргъанлы он жылдан атлагъанды, алай а ары жыл сайын сабийле, устазла да эрикмегенлей жюрюйдюле эм бу окъууланы тёрели этип къойгъандыла. Ала ары къалай сюйюп келгенлерин а сабийлени тизгинликлеринден, хазырланып келип, ана, орус, башха миллетлени да тиллеринде шатык назму айтханларындан да ангыларгъа боллукъду.

Эришиу юч кезиу баргъанды – хар шабат кюнден. Анга бары да шахар школланы окъуучулары къатышхандыла.

Жылдан-жылгъа уллу поэтибизни шуёхлары кёпден-кёп бола баргъаны жюрини членлерин артыкъда къууандыргъанды. Ала уа - таматасы жазыучу, белгили журналист Османланы Хыйса, Нальчик шахарны жер-жерли администрациясыны Билим бериу департаментини баш специалисти, методист Людмила Тлиашинова, назмучу Мусукаланы Сакинат, Къабарты-Малкъарны Жазыучула союзуну къуллукъчусу Бечелланы Сакинат, Малкъар халкъны политика репрессияланы кезиуюнде жоюлгъанларына аталгъан мемориалны ишчиси, махтаулу устаз Насталаны Софият, миллет ийнагъы, къобузчу къызыбыз Башийланы Фатима эдиле. Фатима тап сайланнган музыка бла назму айтыуну бютюнда жылыулу этгенин энчилеп айтыргъа керекди.

Кязимни назмуларына макъам тагъып, аланы эстрадада ариу жырлагъан къызларыбыз, жашларыбыз да бардыла бюгюнледе. Аланы бу эришиулеге къатышхан кичи эгешчиклери бла къарындашчыкълары да къайтаргъандыла конкурсну ахыр кюнюнде ол жырланы. Бёлляу айтхан, тепсеген жашла бла къызла да болгъандыла. Аланы араларында жыйырма тогъузунчу номерли гимназияны окъуучусу Хочуланы Ясминни, алтынчы школдан Ахматланы Къурманны бла аны эгечи Мадинаны энчи айтыргъа боллукъду. Мадина къобуз согъуп, къарындашы бла бирге Кязимни «Иги сёз» деген жыры бла къууандыргъандыла ары келгенлени. Ол школдан Бечелланы Айсана уа эссе жазып келтиргенди.

«Радуга» гимназиядан келгенле - Аксорова Амалия, Мекула Наиль, Хакулов Темиркан Мечиланы Кязимни назмуларын малкъар, къабарты, орус тилде да айтхандыла. Аланы ингилиз тилде айтханла да болгъандыла ол кюнледе.

Отуз биринчи номерли школдан Кучукланы Руслан а кеси уллу поэтге атагъан назмуларын окъугъанды. Ол окъуу мектепден Жаболаны Альфия, Мусукаланы Сулейман да назму айтыуда айырмалы болуп чыкъгъандыла.

Этезланы Айла бла Алийланы Даниял а назмучуну сабийлеге аталгъан къысха чыгъармаларын кезиу-кезиу айтып, сейир композиция къурагъандыла. Ала отуз ючюнчю номерли школда окъуйдула. Андан Уяналаны Ибрагим да, миллет кийимле да кийип, дауурбас къагъып, аны къолунда ойнатып, сейирсиндиргенди ары келгенлени. Бу школдан Бёзюланы Джамиля жырлагъанда, зал шошайып тынгылагъанды. Къызчыкъны ариу ауазы халкъыбызны бушуулу, махтаулу да тарыхын сакълагъан мемориалны саулай алып, тилибизни, тинибизни да айбатлыгъын кёргюзтгенди.

Ючюнчю номерли школда окъугъан Мызыланы Алия бла Арипшев Адам, назмула айтхандан сора да, миллет тепсеу кёргюзтюп, той адетлерибизни ариулукъларына сейирсиндиргендиле.
Тёртюнчю номерли школдан Асанланы Амирхан ана тилибизде назмуланы шатык окъугъаны бла белгилиди. Ол да къууандыргъанды ол кюн Кязимни поэзиясын сюйгенлени.

Мемориалны директору Теммоланы Фаризат келгенлеге – ата-аналагъа, устазлагъа, сабийлени барысына да, бу къайгъылы заманнга да къарамай, халкъыбызны бек уллу поэтни хурметине ары келгенлери ючюн ыразылыгъын билдиргенди эм саулукъ тежегенди. Жюри алагъа атагъан саугъаланы къачан эм къайда берлигин кёп бармай билдирликди.