Жыйылыуда белгили этмей ишлеуню азайтыу эм урунуу байламлыкъланы ачыкълау ведомствола аралы комиссияны борчларына къаралгъанды

Россей Федерацияны Шимал-Кавказ федерал округда толу эркинликли келечиси Юрий Чайка СКФО-да Белгили этмей ишлеуню азайтыу эм урунуу байламлыкъланы ачыкълау ведомствола аралы комиссияны биринчи жыйылыуун бардыргъанды. Анга Къабарты-Малкъарны Башчысы Казбек Коков да къатышханды. Видеоконференция халда кенгешге РФ-ни урунуу эм социал къоруулау министрини орунбасары Елена Мухтиярова, РФ-ни Генеральный прокуроруну орунбасары Андрей Кикоть, Россейни МВД-сыны Шимал-Кавказ федерал округда Баш управлениясыны начальниги Сергей Бачурин, округну субъектлерини таматалары, сейирлери болгъан федерал профильли структураланы жер-жерли бёлюмлерини, жамауат организацияланы келечилери къатышхандыла.

Кенгешни ача, Юрий Чайка Белгили этмей ишлеуню азайтыу эм урунуу байламлыкъланы ачыкълау ведомствола аралы комиссия Россей Федерацияны Президентини 2021 жылда 29 августда буйрукъларына кёре къуралгъанын чертгенди.

«Къырал Башчы 2022-2024 жыллагъа белгили этмей ишлеуню азайтыу эм урунуу байламлыкъланы ачыкъ этиу жаны бла жумушланы планын жарашдырыргъа эм къабыл кёрюрге буюргъанды», - деп белгилегенди Президентни округда келечиси.

Юрий Чайка айтханнга кёре, белгили этмей ишлеуню азайтыу эм урунуу байламлыкъланы ачыкълау тема Шимал Кавказгъа бек магъаналыды. Баш сылтаулагъа ишсизликни, ишчилени кёплюгюн эм ишчилени кеслерини урунууларын ачыкъ этиуде сейирлери болмагъанын санаргъа боллукъду.

«Къуралгъан болумлада инсанланы эм юридический лицоланы урунуу байламлыкъларын «акъларча» кёллендириу амалланы сингдириу изленнгенича, белгили этмей уруннганланы  ачыкъларча, ол халны болдурмазча этиуде контроль эм надзор этген органланы эркинликлерин кенгертиу да керекди. Росстат берген багъагъа кёре, СКФО-ну субъектлеринде белгили этилмеген экономикада кюрешгенлени ёлчеми ишлеген халкъны жарымындан кёпдю, ол а Россей Федерацияда орталыкъ кёрюмдюден эки кереге кёбюрекди», - деп, эслерин бургъанды жыйылгъанланы полпред.

Белгили этмей ишлеуню азайтыу эм урунуу байламлыкъланы ачыкълау планны магъанасыны юсюнден РФ-ни урунуу эм социал къоруулау министрини орунбасары Елена Мухтиярова билдиргенди. Промышленниклени эм предпринимательлени россей союзу округну тийресинде урунуу байламлыкъланы ачыкъ этиу жаны бла тындыргъан амалланы юсюнден РСПП-ны Шимал-Кавказ федерал округда бёлюмлерини координация советини председатели, РСПП-ны вице-президенти Владимир Гурьянов айтханды.

РФ-ни Генеральный прокуроруну орунбасары Андрей Кикотьну сёлешиуюню темасы белгили этмей урунууну шартларын ачыкъ этиу эм аланы кетериу жаны бла урунуу законодательствону толтурулууунда прокурор надзорлукъну болуму эм сынамы болгъанды. Регионда белгили этмей ишлеуню азайтыу эм урунуу байламлыкъланы ачыкъ этиу жаны бла тамамланнган жумушланы юсюнден Дагъыстан Республиканы Башчысы Сергей Меликов эм Шимал Осетия-Алания Республиканы Башчысы Сергей Меняйло айтхандыла.

Жыйылыуда белгиленнгенича, Россей Федерацияны Правительствосуну Председатели Михаил Мишустинни буйругъу бла округда толтурулгъан амалланы чеклеринде Россейни Минэкономразвитиясында Шимал-Кавказ федерал округну субъектлеринде «жашырын» экономиканы юлюшюн азайтыу эм халкъны урунууун ачыкъ этиу жумушла да ары къошулгъан экономика айныуну юлгюлерин къурау системалы амалла жарашдырылгъандыла.

«Регионну хурметли оноучулары, сизден тилеригим – белгили этмей ишлеуню азайтыу эм урунуу байламлыкъланы ачыкъ этиу ведомствола аралы регион комиссияны ишлерин тирилтигиз, Россейни Урунуу министерствосу жарашдыргъан Мероприятияланы планыны мурдорунда жумушланы планларын хазырлагъыз эм къабыл этигиз, дагъыда аланы тийишлисича бардырыу жаны бла комплексли амалланы излегиз. Кесими жанымдан не жаны бла да болушлукъ тапдырыргъа хазырма, - деп белгилегенди кесини оюмун Юрий Чайка. – Урунуу байламлыкъланы «жашырынлыкъдан» чыгъарыу бек магъаналы къырал жумушду. Бюгюнлюкде аллай ишчилени жашауларыны игилиги бла тюзюнлей байламлы болгъан мурдорлу урунуу эркинликлери закон бла къорууланып тюйюлдюле. Инсанланы бу къауумуна не жаны бла да къырал билеклик этиу – ол, мени акъылыма кёре, бизни барыбызны да баш борчубузду».

Тийишли документлерин жарашдырмагъанлай тыш къыраллы гражданланы эм гражданстволары болмагъанланы субъектлени тийресинде ишлерча чакъырыуланы азайтыу жаны бла толтурулгъан амалланы юсюнден Россейни МВД-сыны Шимал-Кавказ федерал округда Баш управлениясыны начальниги Сергей Бачурин билдиргенди.

Кенгешни эсеплерине кёре, буйрукъланы тизмеси къуралгъанды, аланы толтурулуулары контрольгъа алыннганды.