Бир-бирни ангылау - шуёхлукъну эм мамырлыкъ жашауну жолу

Кёп болмай  Къабарты-Малкъар къырал университетде  Маданият байламлыкъла – мамырлыкъгъа бла келишиулюкге жол деген «тёгерек стол» болгъанды. Аны вузну библиотекасы къурагъанды. 
Миллетлери, динлери, къолайлыкълары башха-башха болгъанланы араларында ангылашыныулукъгъа себеплик этген амалланы сюзюуге белгили алимле, жамауат биригиулени министерстволаны, билим бериу эм маданият учрежденияланы келечилери, школланы таматалары эм университетде тыш къыралладан келип окъугъан студентле да къатышхандыла. 

Жыйылыуну ача, КъМКъУ-ну президенти Барасби Карамурзов: «Кёбюсюнде адамла билим бериуню юйретиу бла тенг этедиле. Ол а алай тюйюлдю; билим бериу иги да кенгди, ол къыралгъа хайыр келтирлик  кадрланы хазырлауду. Юйретиу а аны жалан бир кесеги болгъанлыкъгъа, адамны дуниягъа къарамын тюрлендиреди. Ол себепден культураланы араларында байламлыкъла къураугъа ахшы себеплик этеди. Шёндюледе  жаш тёлюге бютюн бек ма ол керекди», - дегенди ол. 

Тюбешиуню къурагъан Мадина Буранова «тёгерек столну» баш магъанасы миллетлени арасында байламлыкъланы кючлерге, саулай да къыралда  мамырлыкъны  айнытыугъа жораланнганын чертгенди. КъМР-ни жарыкъландырыу, илму эмда жаш тёлюню ишлери жаны бла министрини орунбасары Ирина Шонтукова уа республикада бу жаны бла не зат этилгенин айта, билим бериуде окъуучуланы юйретиуге энчи эс бурулгъанын белгилегенди.

КъМКъУ-ну выпускниги, «Халкъла аралы ислам миссия» деген организацияны таматасы Шафиг Пшихачев бюгюнлюкде жаш адамланы дин жаны бла юйретиуге къарамын билдиргенди. «Кесин муслийманнга, иги адамгъа санагъан инсан асыл къылыкълы болургъа керекди. Хар адам да энчиди, миллетни келечисиди деген сезимни тас этерге жарамайды.  Глобализацияны кезиуюнде биз маданиятыбызны сакъларгъа борчлубуз», , дегенди ол.

КъМР-де Пятигорск эм Черкесск епархияны келечиси Константин Осипов  а культура хар кимге энчи болгъанын айта, аны юсю бла юйюрде окъуна  даулаш къозгъалыргъа боллугъун чертгенди. Ол айтханнга кёре, жаш тёлюню ангыларча, аланы жашауларын, оюмларын билирге, керек жерде уа юйретирге да керекди.

Жыйылыуда дагъыда КъМР-ни Граждан обществону институтлары бла байламлыкъла къурау эмда миллетлени ишлери жаны бла министри Анзор Курашинов, Нальчикни 4-чю номерли гимназиясыны бла 31-чи номерли орта школуну таматалары Римма Налоева бла Елена Свириденко, Педагогика, психология эм физкультура-спорт билим бериуден институтну таматасы Ольга Михайленко эм башхала да сёлешгендиле.