Республиканы социал-экономика айныууну кёрюмдюлерин сюзгендиле, проектле бла программала къалай толтурулгъанларына къарагъандыла

КъМР-ни Башчысы Казбек Коков кезиулю «муниципал сагъатны» бардыргъанды. Анда республиканы социал-экономика айныууну 9 айгъа эсеплери чыгъарылгъандыла, федерал эмда республикалы проектле бла программала къалай толтурулгъанларына къаралгъанды эмда коронавирус инфекцияны жайыла барыууна къажау мадарла белгиленнгендиле.

Кенгешге КъМР-ни Правительствосуну Председатели Мусукланы Алий, КъМР-ни Башчысыны Администрациясыны таматасы Мухамед Кодзоков, вице-премьер Марат Хубиев, КъМР-ни саулукъ сакълау министри Рустам Калибатов, жер-жерли администрацияланы башчылары да къатышхандыла.

Премьер-министр республиканы социал сферасыны бла экономикасыны айныуларыны баш кёрюмдюлерини толу болмагъан эсеплери бла шагъырейлендиргенди. Жюкленнген товарланы, тамамланнган ишлени бла жумушланы ёлчеми 38,3 миллиард сомгъа жетгенди, промышленность производствону индекси 90,5 процентни тутады. Эл мюлк продукцияны бла къурулушну ёлчемлери ёсгендиле. Баш капиталгъа салыннган инвестицияла 9 айны ичинде 19,2 миллиард сом боллукъдула, деп сакъланады. Ол а былтырны бу кезиуюнден 4,5 процентге асламды.
 
Розница сатыу-алыуну ёлчеми 120 миллиард сомгъа жетер деп белгиленеди. Ол а былтырны бу кезиую бла тенглешдиргенде, 122 процентни тутады. Тийишли службалада эсепде тургъан ишсизлени саны быйылны 1 октябрине 13,5 минг болгъанды. Ол а былтырдан 5,5 кереге азды.

Мусукланы Алий билдиргеннге кёре, 9 айны ичинде республиканы жокълагъан туристлени саны 840 мингнге жетгенди, ол а былтырны ол кезиуюнден эсе 2,2 кереге асламды. Аны бла бирге ич эм тыш туризм сферада хакъ бла халкъгъа этилген жумушланы ёлчеми 9 айгъа 1,4 кереге ёсгенди.

Регион проектлени юслеринден айта, премьер-министр ол жумушха муниципалитетлеге берилген ахчаны 65 проценти хайырланылгъанын билдиргенди. Прохладный, Бахсан эмда Элбрус муниципал районлада миллет проектле бла байламлы ишле бошалгъандыла.

Премьер-министр билдиргеннге кёре, жылны башындан бери республикагъа тюшген файдаланы ёлчеми 35,2 миллиард сомну тутады. Ол а планны 78 процентиди. Республикалы бюджетге налогладан эмда аладан тышында тюшген файда былтырдан эсе миллиард сомгъа кёбейгенди эмда белгиленнген кёрюмдюледен аслам болгъанды. Республикалы бюджетни файдаларыны битеу ёлчеминде кеси файдалары 26,4 процентни тутадыла.

Къоранчланы юслеринден айтханда, битеу социал магъаналы жумушлагъа деп белгиленнген ахча заманында эмда толусунлай бериледи. Правительствону Председатели жылны башындан бери коммерциялы кредитле алынмагъанларын, аны хайырындан къырал борчну тёлеуге къоранчла азайгъанларын энчи чертип айтханды.

Казбек Коков республиканы Правительствосуна 9 айны эсеплерине кёре толу отчёт хазырларгъа буюргъанды. Ол бир-бир муниципал къуралыулада кёрюмдюлени юслеринден бютюн тынгылы билирге кереклисин эсгертгенди. Сёз ючюн, республиканы ара шахарында жол къурулушну, Зольск районда социал объектлени жангыртыуну, Май эмда Прохладна районлада эски юйледен кёчюрюуню программасы бла байламлы соруула бергенди. Къурулушда халкъ аслам сурагъан фатарланы ишлеуге кёчерге кереклисин айтып, башха регионланы ол жаны бла амлларын тинтирге буюргъанды.

Республиканы Башчысы юйлени жылытыу къалай къуралгъанына энчи эс бургъанды. Аны буюрууу бла жашау журтла эмда коммунал мюлкню предприятиялары кёп фатарлы юйлеге жылыуну  планда белгиленнген болжалдан эки ыйыкъ алгъа жибергендиле. Казбек Коков халкъны тарыгъыуларына, билдириулерине эс бурургъа, чыкъгъан чырмауланы кетериу жаны бла мадарланы созмай этерге кереклисин къаты эсгертгенди.

Нальчик шахар округну администрациясыны башчысы Таймураз Ахохов бюгюнлюкде округда кёп фатарлы юйлени 95 проценти жылыу бла жалчытылгъанларын, 38 юй къалып тургъанын билдиргенди. Ол управляющий компанияланы ишлери бла байламлы болгъанын айтып, алагъа да жууукъ заманлада жылыу бериллигине ышандыргъанды.

Казбек Коков жыйылгъанланы эслерин РФ-ни Правительствосуну кир-кипчик контейнерле алыугъа ахча бёлюуню юсюнден бегимине бургъанды эмда тийишли буйрукъла бергенди.

Поделиться: