Психология бла билим бериуню юсюнден сёлешиннгенди

Кёп болмай Къабарты-Малкъар къырал университетни Элбрусда илму-излем арасында «Психология бла билим бериу: сынам, къыйматлылыкъ эм жангычылыкъла» деген ючюнчю бетеуроссей  форум ётгенди. Ол очно эм заочно халда баргъанды. Анга Россейден, Белоруссиядан, Молдавиядан, Германиядан, Испаниядан вузла бла колледжлени преподавательлери, школланы устазлары, алимле, аспирантла, магистрантла эм  студентле да къатышхандыла.  

Конференцияны Илмуну бла технологияланы жылына атап, КъМКъУ-ну Педагогика, психология эм физкультура-спорт институту бла Психология болушлукъ тапдырыу арасы къурагъандыла. Аны магъанасы билим бериуде психологияны теория эм практика жанларын тинтирге, жыйылгъан сынамны бир бирге билдирирге эм къыйматлы жолланы табаргъады.   

Форумгъа къатышханлагъа жетишимле тежей, КъМР-ни Парламентинде жарыкъландырыу, илму эмда жаш тёлюню ишлери жаны бла комитетини таматасы Нина Емузова, профильли ведомствону таматасы Анзор Езаов эм КъМКъУ-ну билим бериу жаны бла проректору Вадим Лесев сёлешгендиле.

«Республикада билим-бериу учреждениялада мюлк-техника мурдорну игилендириуге аслам эс бурулады. Анга кёре, илму, излем, инновация ишлени бардырыргъа онгла тапдырыладыла. Ол санда саулукъларында бир тюрлю кемчиликлери болгъанланы дистанция халда окъутурча жангы информация технологияла да тири сингдириледиле.  

Болсада хар заманда уллу ышаныулукъ педагоглагъады. Ала чыгъармачылыкъ жаны бла айнырча, конкуренцияны кезиуюнде бийик технологияла бла ишлерге юйренирча эм саулай жашау болумлары игилендирилирча мадар этерге кюрешебиз, - дегенди Анзор Езаов. Нина Емузова да, айтылгъан сёзлеге къошула, Минги тауну этегинде баргъан конференция билим бериуню айнытыугъа ахшы себеплик этеригин чертип, анга сынамлы специалистле бла бирге студентле да къатышханларын бютюн къыйматлыгъа санагъанды.

Къазанны федерал психология эм билим бериу университетини ректору Айдар Калимуллин да быллай тюбешиулеге жаш адамла да къошумчулукъ этгенлерин бек магъаналыгъа санагъанды. Испанияны Марбелье шахарыны 1-чи номерли Орус школну таматасы Ирина Чистякова уа видеоконференция халда конференция регионла эм халкъла аралы байламлыкъланы кючлерге себеплик этеригин эм айырмалы проектлени да жашауда бардырыргъа болушуругъун айтханды.  
 
Педагогланы бла психологланы докладларында устазланы вузлада хазырлау, жангы трендлени сингдириу, школчулагъа бир къауум тыш къырал тил билдириу, юйретиу, тамата классланы келечилерине усталыкъ сайларгъа болушуу эм башха темала бла байламлы болгъандыла.

КъМКъУ-ну педагогика, психология эм физкультура-спорт институтуну таматасы, акмеологияны доктору Ольга Михайленкону инклюзив билим бериуде хайырланнган психология-педагогика амалла бла байламлы ишине коллегалары сейир этип тынгылагъандыла. Ол къачан да университетде сакътлагъа аслам эс бургъанларын билдиргенди. Сёз ючюн, былтыр бла быйыл сакъатла бла саулукъларында бир тюрлю кемчиликлери болгъан 292 студент окъугъанларын белгилегенди. Аладан 160 бакалавр, 12 магистр, 3 аспирант бардыла эм 117-си уа колледжледе окъуйдула.  

Конференцияны иши алты тюрлю секторгъа бёлюннгенди: «Бюгюннгю дидактикада жангы психология аспектле», «Окъуучулагъа психология-педагогика болушлукъ тапдырыу», «Инклюзив билим бериуню психология аспектлери», «Билим бериуге гуманизм жаны бла къарам», «Билим бериуню психология жаны бла игилиги», «Психология-педагог усталыкъны айнытхан шарт».

Андан сора да, форумгъа къатышханла, билимлерин ёсдюрюрча «Билим бериуде практикалы психология» деген программагъа къатышхандыла. Аны чеклеринде мастер-классла эм тренингле да ётгендиле. Ахырында окъулгъан докладла, илму статьяла, жыйымдыкъ китапха кийирилгендиле.