Республиканы курортларыны айныу жолларын, туристлени къоркъуусузлукъларын жалчытыу сорууланы сюзгендиле

Къабарты-Малкъар Республиканы Башчысы Казбек Коков бу кюнледе Къабарты-Малкъаргъа иш бла келген Ростуризмни таматасы Зарина Догузова бла тюбешгенди. Ала Къабарты-Малкъарны курортларыны айныу жолларыны, республикада жашаугъа кийирилген турист проектлеге Ростуризмни себеплигини, туристлени къоркъуусузлукъларын жалчытыуну сорууларын сюзгендиле.

КъМР-ни Башчысы Ростуризмни таматасына регионнга келгени эм туризмни айныу ызларын сюзерге онг болгъаны ючюн ыразылыгъын билдиргенди.  Ол пандемия бла байламлы къыйын кезиуде Ростуризмни къауумуну энчи къошумчулугъун да белгилегенди.

«Къабарты-Малкъаргъа эм саулай къыралгъа да туризм бёлюмню айныуу жаланда экономиканы соруулары тюйюлдю, ол маданиятланы байламлыкъларыды, къыралны кючлениуюдю», - деп белгилегенди Казбек Коков.

Республиканы оноучусу республикада туризм бёлюмню айнытыу жаны бла арт жыллада тындырылгъан ишни юсюнден хапарлагъанды. Ол ишни эсебине уа туристлени келиулерини кёбейгенин санарчады.  Ол Къабарты-Малкъарда туризмни тири солуу бла байламлылыгъын эмда Минги тауда алгъаракъда жерлерин тапхан бушуулу ишле къоркъуусузлукъгъа, бек биринчиден а, норматив-праволу регулированиягъа эс бурургъа тийишли болгъанын кёргюзтгенлерин чертгенди.

Зарина Догузова КъМР-ни турист къолайлыгъына бийик багъа бергенди. «Туристлени келиулерини ёсгени бла байламлы республика жылны эсеплерине кёре миллион туристге жетеригин кёребиз – ол бек уллу эсепди. Къабарты-Малкъар уллу ариу къыралыбызны картасында турист къолайлыгъы болгъан энчи магъаналы жерча белгиленеди, - дегенди ол. – Мында дуния даражалы табийгъат къыйматла бардыла, ол эм алгъа Минги тауду – Европаны эм бийик тёппеси, ариулукълары бла алагъа жетген болмагъан Чирик кёлле эм маданият хазнабызны объектлери. Туристлени келиулери кёбейеди, ол жаны бла инфраструктураны, маршрутланы, курорт шахарланы араларын игилендириу, аланы туристлеге тап келиширча жарашдырыу магъаналыды».

Ростуризмни таматасы туризм экономиканы магъаналы бёлюмлеринден бири болгъанын да белгилегенди. «Бюгюнлюкде качестволу солуу, саулукъну кючлендириу эм бош заманны ырахат оздуруу шёндюгюлю адамны мурдорлу къыйматыды. Туризм бёлюмню айныта, биз эм алгъа республиканы жамауатыны юсюнден сагъыш этебиз, ала ишчи жерле бла жалчытылынадыла, андан сора да, республиканы ариу тийрелерин кеслерине жангыдан ачадыла», – дегенди Зарина Догузова. Ол регионну Башчысыны туризм халкъланы бирикдиреди деген оюму бла толусунлай келишгенин да билдиргенди: «Дунияны, къыралынгы эм тёрелени билиу жаны бла эм сейир амалла солуу бла жолоучулукъдула. Къабарты-Малкъарда уа онгла асламдыла: маданият хазна, табийгъат, рекреация тийреле, миллет энчиликле».

Зарина Догузова Ростуризмни системалы халда регион бизнесге болушлукъ этерге хазырлылыгъын да чертгенди. Туризм бёлюмде къоркъуусузлукъну сорууларыны юсюнден айта, Догузова ол жарсыу жаланда Шимал Кавказны курортларында угъай, тири солуу бла тау туризм айныгъан къыралны битеу регионларында да болгъанын айтханды.  Казбек Коков аны бла байламлы республиканы правительствосу предложенияланы жыйымдыгъын хазырлагъанын билдиргенди. Къабарты-Малкъардан предложениялагъа федерал даражада норматив документни хазырлагъанда къараллыкъды эм ала эсге алынырыкъдыла.

Зарина Догузова Ростуризм законла чыгъарыуда ол жаны бла башламчылыкъланы жыйымдыгъын, туризмни юсюнден жангы законну къабыл кёрюрча подзакон актланы хазырлагъанын белгилегенди.  Алып айтханда, эндиги жыл инструктор-проводникле борчлу халда аттестацияны ётерге керек боллукъдула, маршрутланы сертификациясы, аланы категорированиялары   этилликди, инструктор-проводник ашырмагъанлай чыгъаргъа жарамагъан маршрутланы тизмеси къураллыкъды, адамлагъа кёре аланы саны да нормативле бла белгиленирикди, организациялагъа контроль этген система да боллукъду. «Бу затла барысы да жазыллыкъдыла эм регламентация этилликди, тири солуу бла къоркъуулу бёлюмледе къоркъууланы азайтырча. Закон кючюне 2022 жылда 1 июльда кирликди», - дегенди Догузова.

Поделиться: