Жолланы игилендириуге – он миллиардха жууукъ сом

Къабарты-Малкъарда «Къоркъуусуз эм качестволу автомобиль  жолла» деген миллет проектни чеклеринде        ремонт этиу, жангыртыу  эмда къоркъуусузлукъну жалчытыу жумушлагъа  он миллиард  сом чакълы бир  бёлюнюрюкдю.
Программаны  толтурур муратда  республикада  «Жол сеть» эмда «Жол мюлкню айнытыу мадарла» деген регионла  аралы проектле да жарашдырылгъандыла эм  къабыл кёрюлгендиле.  
КъМР-ни къурулуш эмда жол мюлк министри Вячеслав Кунижев  айтханнга кёре, алты жылны ичинде узунлугъу  83,6 километр чакълы  болгъан автомобиль жол ишлерге  эм игилендирирге мурат этиледи. Аны бла бирге  408,6  километрлик  участокда ремонт этилликди.  Республикалы магъаналы, ол санда эллени  къатлары бла баргъан жолланы  181,4 километри чакълы биринде игилендириу ишле бардырыллыкъдыла эм кече жарыкъ болурча чыракъла орнатыллыкъдыла.