Электрокючню юсюнден сабийле бла ушакъ

«Россети Шимал Кавказ» компанияны бизни республикада бёлюмюню келечилери школчулагъа деп электрокючню къоркъуусузлу хайырланыуну юсюнден тёрели дерс бардыргъандыла. Бу жол ала «Тейри къылыч» санаторийде болгъандыла.

Нальчикде электросетьлени урунууну къоруулау къауумуну башчысы Батчаланы Ирина сабийлеге токну юсюнден кёп сейир хапарла айтханды. Ол хайырлы эмда бек къоркъуулу болгъанын билдиргенди. Аны бла бирге келген энергетикле да юйде приборла къалай ишлегенлери бла шагъырейлендиргендиле. Сора дагъыда тышында электрокюч объектлени къатларында кеслерин къалай жюрютюрге кереклисин ангылатхандыла, эшиклери ачылып къалгъан трансформатор подстанцияладан, юзюлюп жерге тюшген ток чыбыкъладан бек уллу къоркъуу чыкъгъанын туура этгендиле.

Хар айтылгъаннга сабийле уллу сейир этип тынгылагъандыла. Ызы бла викторинагъа къатышхандыла, «ток уруп эси азгъан» манекенни юсюнде биринчи болушлукъ берирге юйреннгендиле.

Дерсни ахырында тышына чыгъып, ала асфальтда электрокючню юсюнден тюрлю-тюрлю суратла эм белгиле ишлегендиле. Къонакъла уа сабийлени барына да оюнла эмда китапла юлешгендиле.

«Электрокюч сабийлени жашауларында магъаналы жерни алады. Ол юйдеди, сабий садикдеди, школдады, орамдады. Бери келип, гитчеле бла аны юсюнден ушакъ этген энергетиклеге биз бек ыразыбыз», - деп белгилегенди санаторийни билим бериу бёлюмюню башчысы Глашланы Зухура.