Хунерли школчулагъа болушургъа алланып

Кёп болмай «Билим бериу» миллет проектни чеклеринде Элбрусну орта школунда цифралы эм гуманитар усталыкъладан билдирген «Точка роста» араны ачарча кабинетлеге  ремонт этип  башлагъандыла. Мында «Физика», «Биология» эм «Химия» предметледен окъутурукъдула. Бусагъатда ишчиле, терезелени алышып бошап, къабыргъаларын сюрте турадыла. Ара бар мардалагъа келиширикди эм быйыл жангы окъуу жылгъа ачыллыкъды.

Жууукъ заманда быллай арала Тырныауузну 3-чю номерли орта школунда эм 5-чи номерли гимназиясында да ачыллыкъдыла.

- Арала «Жангы школ» къырал программаны эм «Билим бериу» федерал проектге кёре ишленедиле. Аны  баш магъанасы эл жерледе окъуучулагъа шахарда тенглеринден артха къалмай тийишли билим алырча онг къураргъады.  Андан сора да, жаш адамла школ программадан тышында кеслери сайлагъан бир-бир предметледен тынгылы окъургъа онг табарыкъдыла, - дегенди  Элбрус районну администрациясыны башчысыны  биринчи орунбасары Арслан Улимбашев.

Тырныаууз шахарны 5-чи номерли гимназиясыны таматасы Моллаланы Фатима айтханнга кёре уа, быллай араны хайыры бла окъуучула  билимлерин байыкъландырлыкъдыла, техника эм гуманитар илмулагъа да тартыллыкъдыла. Эм игиси уа, школ программаны да качествосу ёсерикди.  
Бюгюнлюкде мектепде «Химия» кабинет толусунлай битгенди. Жангы приборла, инструментле да алыннгандыла.  «Биология» бла «Физика» кабинетледе да ремонт ишле къыстау барадыла. Къысха заманда аланы керекли материалла эм энчи оборудование бла да жалчытырыкъдыла.