Кадрла хазырлагъанларына – бийик багъа

Россейни билим бериуге надзор этген федерал службасыны   сайтында 1030-чу номерли буйрукъ басмаланнганды. Анда В.М.Коков атлы Къабарты-Малкъар къырал аграр  университетге аккредитация этилгенини юсюнден билдириледи.  Анда былай жазылады: «2012 жылны 29 декабринде чыгъарылгъан 273-ФЗ номерли Федеральный законну 92-чи  статьясына тийишлиликде  бийик билим берген федерал къырал бюджет  учрежденияны къырал аккредитациядан жетишимли  ётгенине санаргъа». 

 

Буйрукъну къошакъ кесегинде вуз профессионал халда хазырларыкъ усталыкъланы, специальностьланы кенгертилген къауумлары да кёргюзтюлюпдюле. Алайды да, КъМКъАУ эки кенгертилген къауумгъа кёре -  «Экономика эм управление» эмда  «Юриспруденция» жаны бла. Орта профессионал билим бериу бла специалистлени хазырларгъа эркинлик алгъанды 

Аладан сора да, университетге «Ветеринария» жаны бла  бийик билимли специалистлени - бакалавриатланы -  22 усталыкъ жаны бла   хазырларгъа аккредитация берилгенди. Ол 17 тюрлю жаны бла магистрантланы хазырлауну андан ары бардырлыкъды.  Илму-педагогика кадрланы  хазырлау программагъа кёре аспирантурада да мындан ары алты тюрлю жаны бла билим берирге   эркинлиги барды.

Университетни иши тинтилген кезиуде аны бёлюмлери да бир жанында къалмагъандыла. Алай бла Терк филиалында  беш тюрлю усталыкъгъа юйретирикдиле.

«Къабарты-Малкъар къырал аграр университетни аккредитациядан жетишимли ётгени - алимлени, илму къуллукъчуланы, профессорланы, доцентлени, аспирантланы эмда  студентлени бир бирлерин ангылап, бир бирге билеклик этип ишлегенлерини шартыды», - деп чертгенди  КъМКъАУ-ну ректору  Аслан Апажев. 

Бюгюнлюкде билим берген учреждение  эл мюлкге  тынгылы кадрла хазырлау жаны бла  регионда алчыланы санындады. Аны мурдорунда россейли эмда тыш къыраллы билим бериу вузла,  илму-тинтиу  организацияла, республиканы бек уллу агропромышленный  предприятиялары биригедиле.

Бу окъуу юй аграр илмуну айнытыугъа,  аны билим бериу, бизнес бла бирикдириуге, дагъыда  халкъла аралы проектлеге уллу эс бурады. Башха университетле эмда  илму организацияла бла байламлыкъла жюрютюу  студентлеге  дунияда бола тургъан тюрлениулеге терк   тюшюнюрге  себеплик этеди. Жыйырма биринчи  ёмюрге тийишли кадрланы хазырларгъа университетни битеу онглары бардыла.
Вуз, бек магъаналы тинтиуледен ётюп,  кесини ишин жангы кюч бла андан ары бардырады. Россейли  агропромышленный комплексге  тынгылы кадрла хазырлагъаны ючюн «бек иги» деген белгини  алгъаны уа аны   жангы жетишимлеге кёллендиреди.

Холаланы Марзият.
Поделиться: