Крандан сууну игилендириу амалла

Сууну качествосун игилендириуню тюрлю-тюрлю амаллары бардыла. Аладан бек игилери къайсыладыла? Аны юсюнден  Нальчик шахарны ючюнчю номерли поликлиникасыны врачы Рахайланы Аслижан айтады.

- Сууну ненча кере къайнатыргъа болады?

-Жаланда бир кере! Къайнагъанлай, чай неда кофе этип, ичерге керекди. Къайнатыу сууну  ууладан толусунлай тазалаймыды? Угъай.  Биринчиден, 100 градус иссиликде ёлмей къалгъан микробла кёпдюле. Экинчиден, суудан кадмий бла ртуть, нитратла, пестицидле, темирни тузлары кетмейдиле. Аны узакъ заманны ичинде эм къайтарып-къайтарып къайнатыуу бютюнда хаталыды. Андагъы хлор органика веществола бла реакция этеди, алай бла канцерогенле къураладыла.

-Сууну минералла бла къалай байыкъландырыргъа боллукъду?

-Крандан алыннган сууну жаланда къайнатыргъа угъай, аны дарман суугъа айландырыргъа да болады: аны ичине кремень (отлукъ) эм шунгит ташланы салыргъа керекди. Отлукъ ташны бир ненча кесекчиги аурууну чыгъаргъан бактерияланы къурутады эм юйде жюрютюлюучю сюзгючню орунуна хайырланыладыла.

Бу ташланы юслерине тёрели сууну къуюгъуз да, 2-3 кюнню турургъа къоюгъуз. Андан сора уа аны  ичсегиз, аш орун – чеги тракны -халын, чархыгъызны болумун игилендиреди, веществоланы алышыныуларын тирилендиреди, тиш этлеригизни къанауларын тыяды.

Суугъа  шунгит ташчыкъланы атсагъыз, бютюн къыйматлы боллукъдула: микробла бла бактерияла терк ёллюкдюле. Алай  аллай  сууну олсагъат окъуна хайырланыргъа керекди,  сакъларгъа жарамайды. Ол ташланы суугъа ата туруп, хар жолдан да таза суу бла жууаргъа керекди.

- Магнитли сууну хайырыны юсюнден да айтадыла. Аны къалай этедиле?

-Магнитли сууну жарашдырыр ючюн, сууну магнит шорхадан ётдюрюрге керекди. Суу алай къуюла туруп, аны структурасы тюрленеди, хайырлы болады. Аллай суу къандагъы эм бауурда холестеринни азайтады, веществоланы алышыныуларын терклендиреди, къанны басымын чёкдюреди, бюйрекледе ууакъ ташчыкъланы кетереди.Магнитли сууну дайым ичип турургъа тийишлиди.

-Белгилисича, патчахла сууну кюмюш адырладан ичгендиле.

- Хау, кюмюшлю суу саулукъгъа  бек игиди. Анда ауруу чыгъаргъан микробла болмайдыла. Ионизаторну болушлугъу бла дарманлы сууну терк окъуна жарашдырыргъа боллукъду. Кюмюшлю сууну кюмюш къашыкъны болушлугъу бла жарашдырыр ючюн а, бир сутка заман керек болады.

Кюмюшлю суу бауурлары, талакълары ауругъан адамлагъа, кислотностьлары уллу болгъаны ючюн гастритден къыйналгъан саусузлагъа керекди. Алай алгъа врач бла ушакъ этегиз. Кюмюшлю суу хар кимге да бирча хайырлы тюйюлдю. Аны курсла бла ичерге керекди.

Таза сууну жарашдырыуну эм къыйматлы амалларындан бирлери аны сюзюудю – мембрана фильтрден ётдюрюу.Къайсы сюзгючде да картриджни кезиуюнде алышындырыргъа тийишлиди. Алай этилмесе, алада жыйылгъан органикалы эм органикалы болмагъан  кир затла сууну экинчи кере кирлендирликдиле, аны уулу этерикдиле.