Быйылны бек иги студенти айырылгъанды

Къабарты-Малкъар къырал аграр  университетде  жылны аллында  вузну айырмалы студентин сайлау  ахшы тёреге айланнганды. Озгъан орта кюн да аллай конкурс болгъанды.  
Ары дери  сайлаула факультетледе бардырылгъандыла. Алай бла    "2019 жылны студенти" деген атха тийишли болур ючюн юч жаш бла юч къыз  кеслерин сынагъандыла: агрономия факультетден Толгъурланы Аслижан, ветеринар медицина эмда биотехнология бёлюмден Хажмурат Назранов, механизация эм энергия бла жалчытыудан  Артур Абидов, экономика эм оноу  этиуден Мухамед Гюльден, къурулуш эм жер бла ишлеуден Лаурита Пшихачева,  сатыу-алыу -технология факультетден Фатимат Тлимахова.

 Конкурс юч бёлюмден къуралгъанды. Анга къатышханла  кеслерин энчи халда танытыргъа, жырларгъа неда тепсерге усталыкъларын эмда билимлерин  кёргюзтюрге, соруулагъа жууапла берирге керек  эдиле. Быйыл театрланы жылы болгъаны  себепли сорууланы да асламысы  сахна бла байламлы эдиле. Жаш адамланы барысыны да  хорламгъа итиниулюклери бек уллу болгъанды.  Алай жюри "2019 жылны студенти" деген атха уа жаланда биреуленни тийишли кёргенди. Ол  экономика эм башчылыкъ этиу факультетни студенти  Мухамед Гульденди. 

Толгъурланы Аслижан  а конкурсха къатышханланы араларында эм ариу жырлагъаннга  бла тепсегеннге саналгъанды.  Эришиуге къатышхан башхалагъа да  тюрлю-тюрлю номинациялада  кеслерин кёргюзтгендиле, грамотала, саугъала да алгъандыла. Хар номерден сора  уа   окъуу юйню студентлери,  тенглерин кёллендире,  жырлагъандыла эмда тепсегендиле.

Андан сора да,  студентлени  араларында эки кюнню ичинде  Минги тауну тийресинде солургъа, КъЧР-ни Бал чучхурларына барыргъа  билетле къытар ючюн оюнла къуралгъан эдиле.