Герпегежде жангы окъуу ара ишлеп башлагъанды

«Билим бериу» къырал программалагъа кёре  эллени, гитче шахарланы, школларында къошакъ билим берген «Точка роста» араны  класслары  ачыладыла. Алада школчула жангы технологияла бла шагъырей боладыла,  арада цифралы  эм гуманитар ызлада билим бередиле.

Бу кюнледе Черек районну Герпегеж элини орта школунда аллай эки отоу ачылгъанды. Ол кюн ары КьМР-ни билим бериу, илму эм жаш тёлю ишлери  жаны бла министри Анзор Езаов, Черек районну администрациясыны башчысыны орунбасары Глашланы Артур, районну эллерини школларыны директорлары эм башха къонакъла келгендиле.

Жангы классланы  ачылыулары  къууанчлы халда бардырылгъанды. Школну директору Бёзюланы Хусей школчуланы къонакъла бла шагъырей этгенди, сабийлеге билим алыргъа, республиканы Билим бериу, илму эм жаш тёлю ишлери  жаны бла министерствосу дайым болушуп тургъаныны юсюнден айтханды. Ызы бла Анзор Езаов сёлешгенди.

- «Точка роста» ол билимни мурдоруду. Сизге, ёсе келген тёлюге, жашау жолугъузда устазла, врачла неда башха усталыкъла сайларгъа себеплик этерикди, - дегенди ол.

Республиканы оноучулары, школлагъа дайым да эс буруп тургъанлары ючюн,  ыразылыгъын Черек районну администрациясыны орунбасары Глашланы Артур ыразылыгъын билдиргенди. Аталаны, аналаны атларындан сёлешип, къонакълагъа ыспас этген а Кючмезланы Сакинат болгъанды.