Айтишник – тамблагъы кюнню сурамлы специалисти

Стратегия башламчылыкъла жаны бла агентствону экспертлерини оюмуна кёре, беш жылдан информация технологияла экономиканы иги кесегин бийлерикдиле. Ол заманда уа эм биринчиден кадрлагъа билимли «айтишникле» изленирикдиле. Электрон амалланы кенг хайырланалмагъан предприятияла конкуренциягъа чыдаяллыкъ  тюйюлдюле, ол санда жангы технологияладан узакъ таматала да жерлерин тас этерчадыла деп билдириледи КъМКъУ-ну пресс-службасындан.

Белгилисича, Къабарты-Малкъарны къырал университети республиканы  экономикасын айнытыугъа аслам эс  бурады. Ол себепден   эрттеден цифралы технологияны къыйматлыгъын  сезип,  аны   айнытыугъа уллу къыйын салады -  инфраструктураны игилендиреди, жангы технология бла байламлы арала ачады, окъуу   программаланы сингдиреди. Мында информатика, электроника эм  робототехника жаны бла бёлюм  ишлегенли бир ненча жыл болады. Бюгюнлюкде ол  Россейде эм керек элли усталыкъладан бирине саналады.  Болсада быйылгъа дери алагъа уллу сурам болмагъан эсе, шёндю уа  бу жаны бла иги   специалистлени кёпле излейдиле. Аладан бирлери Москвадан   программала жарашдыргъан ITV Grop, «Теноспарк» «Титан»  компанияладыла.

Эсге сала айтсакъ, быйыл КъМКъУ-да  ITV Grop биригиуню башламчылыгъы бла Huawei - информация технология жаны бла академия ачыллыкъды. Бусагъатда къытайлы компания Москвада устазланы, керек материалланы эм оборудованияны  хазырлай турады. Аны ючюн ахчаны уа ITV Grop кеси бюджетинден тёлерикди.

Быйыл биринчи сентябрьден башлап университетде «ИКТ-инфраструктура» бла «Жангы информация технологияла» деген  билим бериу блокла ишлерикдиле. Аны бла бирге «Информатика эм санаучу техника», «Экономикада прикладаная информатика», «Информация къоркъуусузлукъ», «Радиотехника» эм «Электроника эм наноэлектроника» усталыкълагъа да сурам ёсгенди.  Бу жаны бла окъурукъ студентлеге ахшы онгла къуралгъанларын да белгилерчады. Стратегия башламчылыкъла жаны бла агентство эм «Точка кипения» ара бардыргъан «Цифровая высота», «Цифровой прорыв» интенсивлени  эм World AI & Data Chaiienge хакатонну себеплиги бла да  жаш адамланы кёбюсю Россейни эм тыш къыралланы белгили компанияларында кадр резервлеге  тюшюрюлгендиле.

Жангы окъуу жылгъа энди жаланда  бир ыйыкъ къалгъанды, аны байламлы КъМКъУ абитуриентлеге  консультация бардырыуун да  тохтатханды. Болсада  информация технология жаны бла окъургъа киргенле  тамблагъы кюнлерин  ойлагъандыла деп таукел айтыргъа жарарыкъды.