Журналист ишни энчилигине тюшюндюргенди

«Машук» жаш тёлю форумгъа къонакъгъа россейли журналист эм телеведущий, «Биринчи каналны» корреспонденти Дмитрий Кулько келгенди. Ол студентлеге журналистиканы эм федерал каналда кесини ишини юсюнден хапарлагъанды.

Къонакъ ишчи жолун «Ставрополье» ГТРК регионал телекомпанияда студент заманында башлагъанды. Ол сюжетлерине гитче интервьюланы салгъанды, тюрлю-тюрлю ууакъ жумушчукъланы да этерге тюшгенди иш юсюнде. Дмитрий инженер-къурулуш факультетни бошагъанды, журналистика жаны бла билими жокъду. Аны ючюн журналистика жаны бла билими иш юсюнде ёсдюргенди.

- Федерал каналгъа ишге чакъырыр ючюн аслам хайырлы жумуш тындырыргъа керек эди. Алай Москвагъа неда Санкт-Петербургга келирге кюрешмегиз. Белгили каналла сени кёрюрге, излерге керекдиле. Алгъа барырдан алгъа сынам алыргъа тийишлиди, - дейди къонакъ.

Журналист ахыр болумланы билирге, жангылыкъланы окъургъа, информация сылтауланы излерге керекди, деп чертгенди Дмитрий. Быллай ишни Д. Кулько бек сейир сериал бла тенглешдиргенди. Анда бир сюжет башхасын алышындырады, жангы жигитле чыгъадыла.

СМИ-леге ышанмаулукъну юсюнден соруулагъа жууап бере, жамауат къайсы информациягъа уллу кёллю болгъанын белгилегенди ол. Башха жанындан къарагъанда, ол пандемияны кезиуюнде билдириуледе излегендиле хапарны. Бу заманны ичинде телеканалланы рейтинглери ёсгенди, Интернетде сюжетлеге къараула да кёбейгендиле.

- Тёгерекде  не болгъанын репортер кёргюзтеди. Ол, болумну аз да игилендирсе, адамла артыкъ ийнанырыкъ тюйюлдюле. Тынгылы репортаж журналист болумну кеси кёзю бла кёрсе болады, - дегенди ол.

Чынтты журналист къызыу точкаладан сюжетлени бла журналист тинтиулени бек сейирлеге санайды. Ол кеси уа Славянскден, Донецкден, Бейрутдан да репортажла этип тургъанын айтханды. Карьераны юсюнден айта, хар журналист да бериулени бардырыучу болургъа сюеди, деген оюм терс болгъанын да билдиргенди Кулько.

- Журналистикада ёрге ёсген деген жокъду. Энине деген барды. Сен хар кюн сайын сейир болумланы кёресе, жангы тарых билесе. Усталыкъ жаны бла ёсюуню юсюнден айтханда, анга тыш къыраллада ишлеу себеплик этеди. Келе тургъан кезиуде автор бериу этерге оюмум барды.

Тюбешиуню ахырында Дмитрий форумгъа къатышханлагъа усталыкъ жаны бла ёсерге, сынам алып башлауда жетишимле тежегенди.

Кетенчиланы Зульфия хазырлагъанды.

Поделиться: