Борчла салыргъа, ишни къураргъа юйретген чемпионат

Х.М. Бербеков атлы Къабарты-Малкъар къырал университетни  педагогика колледжини  студенткасы Алина Кушхаунова «Жаш профессионалла» сегизинчи миллет чемпионатны (WorldSkills Russia) 2020   профессионал усталыкъ эришиуюнде «Гитче класслада окъутуу» ызда сайлауланы эсебинде финалгъа чыкъгъанды. «Школгъа дери билим бериу» сайлауда эсепле сакъланадыла.

2020 жылны 1 августундан 20 августуна дери  Ярославльдеги педагогика колледжни –  «WorldSkills Russia» къымылдауну  регион координация арасыны – мурдорунда «Жаш профессионалла»  миллет чемпионатны  финалына къошулурча дистанцион-очный халлы эришиуле бардырылгъандыла. Алагъа Россей Федерацияны 70 субъектинден 345 конкурсчу къатышханды. Ишлеге  багъаны  35 сертификатлары болгъан экспертле бергендиле, аланы арасында  КъМКъУ-да  «Гитче класслада окъутуу» деген  энчиленнген араны таматасы Людмила Кузьменко да.

Къабарты-Малкъар Республиканы эришиуледе КъМКъУ-ну педагогика колледжини студент къызлары Алина Кушхаунова бла Алёна Кишева кёргюзтгендиле. Аланы ишлерине себеплик этгенле эксперт-компатриотла Созайланы Жаннета бла Фатима Кизарисова болгъандыла.

Педагогика колледжни мурдорунда эришиуню  дистанцион халда бардыргъанда техника излемлерине келишген эки конкурс майдан къуралгъанды, ала шёндюгюлю халкъла аралы стандартлагъа кёре жалчытылыннгандыла.

7-8 августда Алина Кушхаунова «Гитче класслада окъутуу» ызда кесини проектин кёргюзтгенди. Конкурсда дерсни технологиялы картасын, гитче класслада дистанцион халда бардырылгъан дерсни бёлюмлерин методика керекле бла жалчытыуну, билим бериуде электрон онгланы хайырланып ангылатыуну баямларгъа керек эди.

Система кеси аллына сайлагъан конкурс ишлени темаларын къатышханла эришиу башланнгандан сора билгендиле. Алинагъа орус тил предметден «Жайылгъан эм жайылмагъан айтымла» деген тема жетгенди. Видеоконференция халда байламлыкъгъа чыкъгъан окъуучуланы рольларын  волонтёрла толтургъандыла.

Дерс дистанцион халда баргъаны ючюн къыз аны методика кереклерин  бир ненча онлайн платформада къураргъа эм ата-аналагъа эсгертиуле жарашдырыргъа керек болгъанды.

Эришиуню экинчи кюнюнде анга окружающий мир дерсден  «Экология – ол не затды?» деген темагъа заданияла къураргъа, окъуучула дистанцион низамда теманы толу ангыларча этерге борч салыннганды. Алай бла Кушхаунова конкурс ишлени эки уллу модулюн  тамамлагъанды. Эсепде чемпионатны финалына чакъырылгъанды.

«Бек къыйыны заман чеклеге сыйыныу, технологиялы картаны, методика кереклени, таблицаланы, интерактив пособияланы жарашдырыу, аланы координация арагъа ашырыу эди. Ол документле болсала, практика  дерсни жыйырма минутуна сыйыныргъа тынчды.

 Алай эришиу башланнгынчы  заданияны темасы белгисиз болгъаны бютюн сейирди, кесича профессионал чакъырымды. Чемпионат усталыкъ ёсдюрюу жаны бла бек кючлю мурдорладан бириди.  Ол борчла салыргъа, ишни къураргъа юйретеди. Алыкъа окъуй тургъанлагъа, урунуу жолгъа чыкъмагъанлагъа ол бек магъаналыды.

Профессионал усталыкъны чемпионатына былтырдан башлап къатышама. Кеси кесими ёсдюрюп, айнытып  туруу жангы технологиялагъа, амаллагъа, ишни жангы болумларына тюшюнюрге болушады», - деп белгилегенди Алина Кушхаунова.

18 августда «Жаш профессионала»  сегизинчи миллет чемпионатны финалына къатышырча «Школгъа дери билим бериу» деген ызда сайлаула ётгендиле. Регион координация араны тамата эксперти бла видеоконференцсвязьда Алина Кишева  конкурс борчу бла шагъырейленнгенди. Биринчи модульда анга «Кондитер усталыкъ бла шагъырейлендириу» деген тема жетгенди. Аны толтургъан кезиуде къыз усталыкъ хунерлигин кёргюзтгенди эм проектин интерактив  технологияланы хайырланып къоруулагъанды. Экинчи проект модульда Кишевагъа «Адамны саны эм аны саулугъу» деген тема берилгенди.

«WorldSkills чемпионат профессионал усталыкъ жаны бла эришиу болгъаны себепли, анга къатышханла  шёндюгюлю билим бериу технологияла эм оборудование бла ишлей билирге керекдиле. КъМКъУ-ну педагогика колледжинде ол жаны бла хар зат жетишимлиди эм конкурсчуланы  бай интерактив дидактикалы инструментлери бардыла. Ишимде мен болгъан оборудованияны толу хайырланыргъа кюрешгенме», - деп хапарлагъанды Алёна Кишева.

«Жаш профессионалла» сегизинчи миллет чемпионатны (WorldSkills Russia)  2020 профессионал усталыкъ эришиуюню финал конкурсу 6 сентябрьден 27 сентябрьге дери  дистанцион-очный халда бардырыллыкъды. Бизни къызла эки ызда да 7 сентябрьден 17 сентябрьге дери ишлерин кёргюзтюп эриширикдиле. Жаш профессионалларыбызгъа жетишимле тежейбиз.

Жангуразланы Нажабат.
Поделиться: