Университетлени миллет рейтингинде - даражалы жер

Къабарты-Малкъар къырал университет россейли вузланы араларында 55-чи жерни алады. Халкъла аралы «Интерфакс» информация къауум  2020 жылда  Университетлени онбиринчи жыл сайын бардырылгъан миллет рейтингини эсеплерин басмалагъанды. Анга кёре КъМКъУ эки атламгъа ёрге кётюрюлгенди. «Исследования» эм «Инновации» ызлада уа ол СКФО-да алчыды.

«Университетлени миллет рейтинги» проектни чегинде  Россейни 337 даражалы университетлерини бла институтларыны ишлерине багъа берилгенди.  Рейтингге къыралны битеу даражалы университетлери къошулгъандыла: 29 миллет тинтиу университет, 10 федерал, 33 опоралы,  андан сора да, 5-100 проектге къатышхан 21 университет. Дагъыда къыралныкъы болмагъан 7 университетни ишлерине да къаралгъанды.

Аланы специализацияларына кёре 98 классикалы, 105 технический эм технологический, 16 экономика-социальный, 33 аграр, 38 медицина, 33 педагогика, 5 юристле хазырлагъан, 4 гуманитар, 3 дизайн, 3 связь эм 3 туризм университетге багъа бичилгенди.

«Эпидемилогия болум проектни ишине сезимли тюрлениуле кийиргенди, алай рейтингге къошулгъанланы асламысы  рэнкер бла байламлыкъла айныуну бийик даражасын кёргюзтгендиле, 2019 жылда ишлерини юсюнден хапарлагъандыла. 2020 жылны жаз башындан башлап окъуу юйлени администрациялары терклендирилген цифровизациялаугъа, битеу илму-билим бериу процесследе онлайн-тюрлениулеге къошулургъа излегенлерин да белгилейбиз. Жууукъ заманда академиялы жамауат бла биз ол жаны бла амаллагъа эм онглагъа къараяллыкъбыз деп ышанама», - дегенди «Интерфакс» агентствону таматасыны биринчи орунбасары Алексей Горшков.

Университетлени ишлерине алты излемге кёре багъа берилгенди: билим бериу, илму-тинтиу, социал болум, интернационализация (халкъла аралы байламлыкъла), бренд, инновацияла эм технологическое предпринимательство.

Багъаны университетни келечилери толтургъан анкеталада, махкемелени официал сайтларында  басмаланнган кёрюмдюлеге эм РФ-ни Илму эм бийик билим бериу министерствосуну информация къолайлыгъына, СПАРК эм СКАН информация-аналитика системаланы билдириулерине кёре бередиле.

Россейни эм иги вузларыны тизмесини бек башында Москвада М.В. Ломоносов атлы къырал университет турады. Экинчи жерни «МИФИ»  тинтиу ядерный миллет университет алгъанды, ючюнчюню – миллет тинтиу Москвалы физика-технический институт (МФТИ).

Х.М. Бербеков атлы Къабарты-Малкъар къырал университет 2020 жылда  бу рейтингде 57-чи жерден 55-чиге чыкъгъанды. Аны кётюрюлюуюне «Билим бериу», «Бренд», «Тинтиуле эм социализация»  ызлада кёрюмдюлени игиленнгенлери себеплик этгендиле.

Бу жаны бла КъМКъУ юч жылны ичинде  ышаннгылы тохташыулу ёсюуню кёргюзтгенлей турады, Университетлени миллет рейтингинде хар жолдан бийикден бийикге кётюрюле.