Токну урлау тохтамайды

Кёп болмай «Россети Северный Кавказ»-«Каббалкэнерго» биригиуню къоркъуусузлукъ эм коррупциягъа къажау департаментини  келечилери Чегем районну  Каменка элинде  эркинликсиз майнинг бла кюрешип, токну урлагъан шартны ачыкълагъандыла. Саулай алып айтханда, аманлыкъчы 530 минг киловатт сагъат урлагъанды. Ахча бла алып айтханда, ол 4,7 миллион сомдан аслам болады. 

Сагъынылгъан ишге ток бла жалчытылынырча тийишли  келишими болгъанлыкъгъа,  ол токну криптовалютала ишлетирге къоратып,  законодательствону бузгъанды.Тинтиулени кезиуюнде эки къатлы юйню подвалында алты энчи боксда криптовалюта ишлетирча , жыйырма аппарат табылгъанды.  Сагъынылгъан шартла бла байламлы материалла ич ишлени органларына берилгендиле. Энди алагъа РФ-ни Уголовный кодексини 165-чи статьясыны 2-чи кесегини «б» пунктуна  тийишлиликде (Алдап неда ышандырып мюлкге уллу къоранч салгъанлары ючюн)  уголовный иш ачарча къарала турады.  

Майнинг бла кюрешгенлени  хатасындан  ток баргъан чыбыкълагъа бла подстанцияла уллу ауурлукъ бла ишлерге тюшедиле. Аны бла байламлы энергообъектледе аварияла болургъа, ёртенле къозгъалыргъа эм адамны саулугъуна, жашаууна да  хата салырына къоркъуу чыгъады. Ол себепден  «Россети Северный Кавказ» биригиуню  келечилери аллайланы тинтирча  дайым тийишли иш  бардырадыла.

Электрокючню сагъынылгъан шартла бла байламлы хайырланнганларына  ишекли болгъанла  «Россети» биригиуню «къызыу ызына» бу телефон номерге хакъсыз  эм аноним халда сёлешип билдираллыкъдыла: 8-800-220-0-220 неда (220).

Эсге сала айтсакъ, Россейни Правительствосу 2025 жылны 1 январындан  2031 жылны 15 мартына дери  майнинг бла кюреширге жарамагъан регионланы тизмесин белгилегенди. Ол къауумгъа Къабарты-Малкъар да киреди.

Магометланы Сулейман.
Поделиться: