Ичер суу бла сылтаусуз болурча

Къабарты-Малкъарда «Жашау этерча  инфраструктура» миллет проектге кирген «Коммунал инфраструктураны жангыртыу» федерал программагъа  кёре  2025-2027 жыллада ичер суу бла жалчытырыкъ  22 объект ишленирикди неда  жангыртыллыкъды.   Аладан 14-сю муниципалитетлеге жетеди, деп билдириледи КъМР-ни Къурулуш эмда жашау журт-коммунал мюлк министерствосуну пресс-службасындан.

Бу кюнледе тийишли ишле Хабазда да тамамланнгандыла. Ишлени кезиуюнде 7 191,9 метр чакълы бирде таза суу баргъан полиэтиленден быргъыла тартылгъандыла. Андан суу жыйылгъан жерге дери  1 121,8 метр жетеди, андан къалгъаны,  6 070,1 метр кесеги уа, элни ичи бла барады.

Суу баргъан ыз жангы излемлеге келиширча жарашдырылгъанды.  Ол санда басымын уллу-гитче этген эм жапхан устройстволары бла  67 къую ишленнгенди. Аны  бла бирге от ёчюлтгенде хайырланнган   22 гидрант да салыннганды. Элге суу басымы бла келирча суу жыйылгъан жер (водозабор) къуралгъанды, мында уллукълары 50 кубометрге жетген эки чыккыр жарашдырылгъанды эм мал, адам да кирмезча тёгереклери  бла темир буруу тартылгъанды.   

Сагъынылгъан инфраструктураны жангыртылгъаныны хайырындан 260 адамны ичер суу бла сылтаусуз этерге жарарыкъды. Андан сора да, ол келир анга  башха арбазла да къошулурча боллукъдула. Ол шарт мындан арысында да элни айныууна, инвестиция  жаны бла къыйматлылыгъына эм экология жаны бла къоркъуусузлугъуна да себеплик этерикди.

 

 

Магометланы Сулейман.
Поделиться: