Адамны психика саулугъу бла жюрекни болуму байламлыдыла

28 сентябрьден 4 октябрьге дери кезиуде РФ-ни Саулукъ сакълау министерствосу жюрекге жууаплы кёзден къарауну ыйыгъын бардырады. Аны чеклеринде КъМР-ни Саулукъ сакълау министерствосуну  Психиатрияны  бла наркологияны клиника арасыны келечилери адамны психика саулугъу бла жюрекни болуму байламлы болгъанларын эсгертедиле.

 - Адамны сезимлери, хали, осал къылыкълары окъуна бек алгъа жюрекге жетедиле.   Ол къайгъылы болса,  анга дагъыда ичги неда  наркотикле  къошулсала, инфаркт боллугъуна, гипертония башланырыгъына къоркъуу уллуду. Алай къууанырча шартла  да бардыла – жюрекни кючлерге болушхан жорукъла,-дегендиле бизге клиникадан.

Алай бла жюрегигиз  саулугъун тас этмезин сюе эсегиз, бу къыйын болмагъан жумушланы толтурургъа боллукъду. Сёзге, къайгъыла башыгъызны бийлегенде, дарманла неда ичги излемегиз. Аракъы ичгенде бир кесек женгил болгъаннга, жарсыула шошайгъаннга да ушайды, алай ол ётюрюк сезимледиле, ичги затла къан басымны кётюредиле. Аны орунуна тири болургъа, спорт бла кюреширге, терен солургъа боллукъду.

- Тютюн, ичги, алача башха уулу затла къан тамырланы ишлерин бузадыла. Алай бу осал къылыкъланы къойгъан а саулугъу игиге айланнганын бир айдан окъуна сезерикди. Дагъыда заманында жукъларгъа жатыгъыз. Жукъусуз адамда кортизол кётюрюледи, ол да хата салады. 7-8 сагъат жукълагъан а  жюрегине ахшы «жараула» бардыргъаннга тенгди,-деп къошхандыла клиниканы келечилери.

Кюннге сагъат жарым тенгли жаяу айланнган саулукъгъа бютюнда хайырлыды – инфаркт боллугъуна къоркъуу азаяды, аны бла бирге адамны психика болуму игиленеди. Дайым да   врачлагъа барыргъа, саулукъгъа къаратыргъа керекди. «Неден башларгъа билмей эсегиз а – бюгюн  окъуна осал къылыкъладан бирин къоюп, аны орунуна жаяу  жюрюп башлагъыз», - деп чакъырадыла клиниканы врачлары.