Жашау журт ток ызгъа къошулгъанды

Кёп болмай «Россети Северный Кавказ» – «Каббалкэнерго» биригиуню келечилери Нальчикде «Жашил квартал» деген кёп фатарлы жашау журтну ток ызгъа къошхандыла. Алай бла проектге кёре, ол 1,5 мегаватт (МВт) кюч бла жалчытылыннганды. Ишлени кезиуюнде сагъынылгъан юй электрокюч бла тынгылы болурча  подстанцияда къошакъ  мадарла да  этилгендиле. 

Жангы жашау журт комплекс тёрт онеки къатлы юйден къуралады. Анга кёре 14 минг квадрат метрде 216 фатар орналады. Андан сора да, биринчи къатда 92 отоу  тюкенлеге берилгендиле, аны хайырындан онла бла ишчи жерле да къураллыкъдыла. Кёп фатарлы жашау журтну арбазыны  уллулугъу 1,5 гектар чакълы бирди. Мында сабийле ойнагъан эм спорт майданла къуралгъандыла, тёгерек-башны жашиллендирирча да мадар этилгенди.

Саулай алып айтханда, быйылгъы жылны башындан бери «Каббалкэнерго» биригиуню келечилери республикада беш кёп фатарлы жашау журтну 5,8 мегаватт ток бла жалчытхандыла.

Эсге сала айтсакъ, жангы хайырланыучуланы ток ызлагъа къошарча эм электрокюч бла тынгылы жалчытырча жумуш энергетиклени баш борчларындан бирине саналады. Аны себепли бюгюнлюкде «Россети» биригиуде сетьлеге къошулургъа сюйгенлеге таплыкъгъа электрон халда заявка берирча сервис ишлейди. Ол санда Портал-ТП.РФ сайтда энчи кабинетге кирип, ток ызгъа къошарча заявка берирге эм къаллай бир  электрокюч керек болгъанын да белгилерге жарайды.