Жамауат тийрелеге – аслам эс

Быйыл жаз башында  «Жашау этерге инфраструктура» миллет проектге кёре Чегем районда жамауат жерлени игилендириу жаны бла комплексли ишле башланнгандыла.  Эм уллу эм магъаналы объектледен бирине Чегемде «Шахар жибермейди» проектни санаргъа боллукъду. Аны бла байламлы проект былтыр иги шахар болум къурау жаны бла битеуроссей конкурсда хорлагъанды. Паркны уллулугъу 3,5  гектаргъа жууукълашады, къурулушуна 91 миллион сом къоратыллыкъды.   

Ол тауланы, черекни, шахар тийрени, миллет энчиликлени бирге къошуп, алай туура этерик парк маталлы жерди. Кеси да тюз Нальчикни жанындан келе туруп, шахаргъа кирген жерде жангы къуралгъан «Южный» микрорайонда орналлыкъды.  Алайлада  жашагъанла мында солургъа, заманларын зауукълу ётдюрюрге, спорт бла да кюреширге сюерикдиле, деп ышанадыла проектни бардыргъанла.
Аны плитка бла жасалгъан жаяу жолчукълары, гитче кёлчюклери, спорт бла кюреширча, ойнарча майданлары, шинтиклери, кир-кипчик атарча орунлары да боллукъду. Тёгерек-башны жашиллендириуге да аслам эс буруллукъду. Аны бла байламлы мингден аслам  терекчик  орнатыллыкъды.

Ишлени биринчи кезиуюнде «Юг-Строй» къурулуш организацияны келечилери иги кесек  энчи техниканы кючю бла къара топуракъны кетерип эм башха тийишли жумушланы да тамамлап, объектни мурдорун хазырлагъандыла. Бюгюнлюкде  инженер коммуникацияланы тартып эм адамла жюрюген жолчукълагъа плитка салып, сабийле ойнагъан эм спорт  майданлагъа резинден кюйюзле жасап  кюрешедиле. Аны бла  бирге тёгерек-башны  жашиллендирирча мадар да  этиледи.  
Планнга кёре парк быйыл октябрьни ахырына хайырланыргъа берилирге керекди.

Саулайда Чегем районда беш жылны ичинде сагъынылгъан программа бла байламлы 23 кёп фатарлы юйню арбазы эм 16 жамауат жер жангыртылгъанды неда ишленнгенди. 
Эсге сала айтсакъ, сагъынылгъан проектни чеклеринде быйыл Къабарты-Малкъарда 32 жамауат жер ишленирикди неда жангыртыллыкъды. Алай бла,  Тырныауузда, Басханда, Нарткъалада, Къашхатауда, Бабугентде, Анзорейде, Аргуданда, Баксанёнокда, Огъары Жемталада, Огъары Къуркъужинде, Герпегежде, Жангы Малкъарда, Заречноеде, Каменномостскоеде, Октябрьскоеде, Псыгансуда эм Янтарноеде скверле бла аллеяла къураллыкъдыла.