Студентле билимлерин ёсдюредиле

Бу кюнледе «Агропромышленный комплексге кадрла» федерал проектге тийишлиликде Къабарты-Малкъарны къырал аграр университетини студентлери республиканы мюлклеринде сынамларын ёсдюредиле. Аны бла байламлы тамблагъы специалистле жерчиликде уруннганлагъа кезиулю жумушланы тамамларгъа болушадыла. Ишлени кезиуюнде ала усталыкъларын игирек ангыларыкъдыла эм урунургъа да онг табарыкъдыла.   

Сёз ючюн, Инал Тхазеплов КъМКъАУ-ну «Терек бахчалыкъ» бёлюмюню экинчи курсунда окъуйду. Бийик билим алгъандан сора, агроном болургъа умуту барды. Ол себепден алгъадан сынамын ёсдюрюрге онг табылгъаныны магъаналылыгъын, аны бла бирге жууаплылыгъын да иги ангылайды эм салыннган борчну уллу кёллюлюк этмей толтурады.   

Кюз артыны орталарына дери жаш адамла жемишлени жыйгъандан башлап, терек бахчалыкъ бла байламлы башха тийишли жумушланы да этерге юйренирикдиле. Ол санда энчи техника ишле эм жангы технологияла бла да шагъырейленирикдиле. 

Ала эрттенликде тогъуздан башлап, ингирде сагъат бешге дери къармашадыла. Аны бла бирге бир къаууму ишлерге келселе да, башхалары лекциялагъа барадыла. Алай бла билимлерин эм сынамларын да байыкъландырыргъа онг табылады. 

Быйыл аграр госуниверситет, окъуучулары практикаларын ётерча, республиканы онеки уллу мюлкю бла келишим этгенди. Аны баш магъанасы жаш адамланы студент кезиулеринден башлап, ишге юйретиргеди, тынгылы хазырларгъады эм мюлклени кадрла бла жалчытыргъады.