Гаражны къагъытларын жарашдырыу болжал кенгергенди

Адамны гаражы бар эсе, анга эмда ол орналгъан жерге эркинликни 2031 жылда 1 сентябрьге дери жарашдырыргъа жарайды. Аны бла «гараж амнистияны» болжалы энтта да беш жылгъа созулгъанды, деп билдиргендиле Къабарты-Малкъарда МФЦ-да.

Бу амал 2021 жылда кюзню аллында кийирилген эди. Ол адамлагъа эски гаражлары тургъан жерлени къыралны неда муниципалитетни иелигинден кеслерини атларына женгил халда кёчюрюрге онг береди.

Алай болур ючюн а, бир кезиуде талай излем толтурулургъа керекди. Ол санда гараж тынгылы болургъа, кеси да 2004 жылда 29 декабрьге дери ишленирге. Сора сюд аны законсуз орналгъан объектге санамазгъа тийишлиди.

Къырымгъа, Донбассха эмда Новороссиягъа жорукъла башхадыла. Гараж ол регионла Россейге киргинчи ишленирге, жерни кадастр планнга тюшюргенде, аны чеклерин кёргюзтген проект да болургъа керекди. Алай къагъытланы ансыз да жарашдырыргъа боллукъдула.

Гараж ортакъгъа берилген эсе, жерни къагъытларын жарашдыргъанда аны алгъан адамдан эркинлик изленмейди.

Башха тюрлю чурум жокъ эсе, заявлениягъа энди 30 угъай, 20 кюнню ичинде къараллыкъды.

Улбашланы Мурат хазырлагъанды.
Поделиться: