Пенсиягъа чыгъарыкълагъа ‒ льготала

Жыл саны жетип пенсиягъа чыгъаргъа беш жыл къалгъандан сора инсаннга талай льгота бериледи. Аланы къайсыларына кимле тийишли болгъанларыны юсюнден Къабарты-Малкъарда МФЦ-да айтхандыла.

Быйыл быллай даражагъа 1971 жылда туугъан тиширыула эмда 1966 жылда туугъан эр кишиле тийишлидиле. Алагъа (уруннган жерлеринде) диспансеризацияны ётерча эки солуу кюн бериледи. Ол заман ючюн хакъларын тыяргъа жарамайды.

Жыл санын сылтаугъа тутуп, адамны уруннган жеринден чыгъарыргъа неда аны ишге алмазгъа жарамайды. Дагъыда быллай инсанлагъа мюлк эмда жер налогланы тёлегенде льготала бериледиле. Сёз ючюн, объектлени хар тюрлюсюнден да бирери ючюн аны тёлемезге жарайды.

Адам ишсиз къалгъан эсе, анга тийишли пособияны кёбюрек тёлейдиле. Урунуу службада аланы башха усталыкъгъа юйретиу неда кеслерини билгенлерин кючлендириу жаны бла себеплик этерге боллукъдула. Бир-бирде уа алагъа пенсияны болжалындан алгъа (анга жыл саны жетерге эки жыл къалгъандан сора) берип башлайдыла. Алай болур ючюн бу излемле толургъа керекди: иш жабылып неда анда уруннганланы саны азайтылып андан кетиу, жангы жер излеп тийишли службада эсепге туруу, стажны эмда пенсия коэффициентлени ёлчеми мардасына жетиу, ишге орналыргъа онг болмау.

Мында айтылгъан затлагъа адамны эркинлигин тохташдырыр ючюн, абери этерге керекмейди: аны юсюнден информация бир ведомстводан башхасына электрон халда кеси аллына жетеди. Болсада «Госуслуги» порталда неда МФЦ-да аны юсюнден билир амал барды.