Аурууну букъдургъанлыкъгъа, аны хатасы азаймайды

РФ-ни Саулукъ сакълау министерствосу 7-13 сентябрьде кюнлени ичгичиликни эм аны бла байламлы аурууланы азайтыугъа жоралагъанды. Бу кезиуде эсиртген уула адамны санларына къаллай хата келтиргенлерин ангылатыу бютюнда магъаналыды. Алимле ачыкълагъанларыча, ичгини бла наркотиклени хатасындан 200-ден аслам ауруу башланыргъа боллукъду.

- Бирде жамауат арасында аракъымы неда наркотиклеми къоркъуусуздула, деген сейир сорууну эшитирге тюшеди. Алагъа юйню 20-чы неда 30-чу къатындан жыгъылгъанмы игиди деп соруучума. Къайсын сайласанг да, ахыры жарсыулуду,- дейди КъМР-ни Саулукъ сакълау министерствосуну Психиатрияны бла наркологияны клиника арасыны психиатры-наркологу Милана Нагоева.

Ол айтханыча,  наркотикле аракъыдан къоркъуусуздула деген оюм эм уллу ётюрюкдю. Аракъы, наркотикле да адамны саулугъун жокъ этедиле, психикасын бузадыла, битеу жашауун тюрлендиредиле. «Аланы тенглешдирген кесини аурууун, ичгичилигин ариуларгъа кюрешгеннге ушайды»,-дейди нарколог.

Кёпле наркотиклени къоркъуусузгъа нек санагъанларыны юсюнден айтханда, орамда аракъыдан, чагъырдан эсиргенлеге асламыракъ тюберге болады. Кеф адам кесин тапсыз жюрютеди, тюйюшюрге ёчдю. Наркоманла уа жашырын къалыргъа излейдиле, адамланы арасына чыкъмазгъа кюрешедиле. Бу осал оюм аны ючюн къуралгъанды, деп ангылатады ушакъ нёгерибиз.

- Алай аурууну букъдургъанлыкъгъа аны хатасы азаймайды. Ол Икарны юсюнден таурухха ушайды: къанатла уча билгенинге ышандырадыла, алай бираздан ала кюнде кюйюп къаладыла. Наркотиклени, аракъыны ичген адам да эртте-кеч болса да аурууну къыйынлыгъына тюберикди. Алай бла къоркъуусуз уу жокъду – аракъы, наркотикле да адамны жашауун бузадыла. Бизни, врачланы, борчубуз ичгичиликни, наркотиклени кеси хорлаялмагъаннга болушургъады, аны саулукълу жашаугъа къайтарыргъады,- дейди ол.