Къоркъуусузлукъну дерслери

Бу кюнледе къырал автоинспекцияны келечилери Россей МВД-ны «Баксанский» муниципалитетле  аралы бёлюмюню акъылбалыкъ болмагъанланы ишлери жаны бла инспекторлары бла бирге Заюково элде «Атажукино» жай лагерьде тургъан  сабийлеге  бла акъылбалыкъ болмагъанлагъа деп жолда жюрюуню къоркъуусузлугъуну юсюнден «Жорукълагъа кёре жаша» деген юйретиулени бардыргъандыла.

Полициячыла сабийлеге жолда жюрюуню жорукъларын ангылатхандыла. Дагъыда жаяу жюрюген адамланы эслерин бёлюрге боллукъ болумланы юсюнден айтхандыла.

- Орамда баргъан кезиуде, артыкъда жолну ётген заманда эсигизни бёлген затланы барын да кетерирге керекди. Къулакълада наушникле, къолугъузда телефон, гаджетле болмазгъа керекдиле. Капюшонну тешип барыргъа керекди, дагъыда тенгле бла сёлешмезге. Сизни битеу эсигиз жол болумгъа бурулургъа керекди», - деп белгилегендиле полицияны келечилери.

Сабийле бла жаш адамланы велосипедледе, самокатлада жюрюген кезиуде сакъ болууну, жорукъланы бузмаууну юсюнден айтылгъанды.

Ушакъны кезиуюнде полициячыла сабийлеге эки чархлы транспортну жюрютген заманда ала жол жюрюуню жорукъларын сакъларгъа борчлу болгъанларын ангылатхандыла. Дагъыда кече къарангыда водитель сабийлени кёрюрча кийимлеринде жарыкъ белгиле жюрютюрге чыкъыргъандыла.

Сабийле ушакъгъа эс бёлюп къошулгъандыла, соруула бергендиле, полициячыладан толу жууапла алгъандыла.

Тюбешиуню ахырында жашла бла къызла ДПС-ни машиналарына олтуруп, кеслерин аланы орунларында сынагъандыла, деп билдиредиле КъМР-де МВД-ны пресс-службасындан.