Тёгерек-башха къууат берген сквер

Бу кюнледе Нальчикде Сабий эм жаш тёлю чыгъармачылыкъны арасыны къатында,  ачыкъ кёкню тюбюнде  сквер-музейни къурулушу барады. Эсге сала айтсакъ,  былтыр   «Жашау этерге инфраструктура» миллет проектге кирген «Иги шахар болум къурау» программаны чеклеринде бардырылгъан бешинчи битеуроссей къол кётюрюуде аны  11571 адам сайлагъанды.  
Кёп болмай арт-паркны планировкасы жарашдырылгъанды, жаяу жолчукълагъа бордюрла,  плитка да салыннгандыла эм башха жумушла да тамамланнгандыла. Жууукъ заманда  чыракълы чыпынла, гитче архитектура формала эм башха затла да жерлерин табарыкъдыла. 
Саулай алып айтханда, бош тургъан жерде жууукъ заманда  тарыхны бла  чыгъармачылыкъны бирикдирген эм  къууатлыкъ да къошхан  жер къураллыкъды. 
Проектге кёре мында эшикде орналгъан таш суратлагъа  кёрмюч бёлюнюрюкдю эм  тёгерек-баш да жангы излемлеге келиширча жарашдырыллыкъды.  
Сквер кёп да бармай хайырланыргъа берилирге керекди.