Мамырлыкъ хар инсанны къошумчулугъундан къуралады

Къабарты-Малкъарны полициячылары Терроризмге къажау кюрешни кюнюне атап, республиканы школларында тийишли тюбешиуле бардыргъандыла, деп билдиргендиле КъМР-де МВД-ны пресс-службасындан.
Черек районда алагъа ветеран организацияны эмда жамауат советни келечилери Жаболаны Жабраил бла Анахаланы Аида да къошулгъан эдиле. Школчула бла бирге ала «Экстремизм бла терроризм – шёндюгю дунияны къоркъуулары» деген къыйын, алай эм керекли теманы сюзгендиле.

Быллай ушакъланы магъанасы сабийлени эсли болуп, терен сагъыш этерге юйретиудю. Интернет болгъан, информация бек терк жайылгъан дунияда кертини бла ётюрюкню айыра билиу, терс чакъырыулагъа алданмау изленеди хар кимден да.

Полициячыла сабийлеге къыйын болумлада кеслерин къалай жюрютюрге кереклисин ангылатхандыла, болушлукъ излеп къайры сёлеширге боллукъларын билдиргендиле, сакълыкъ хар кимден да изленнгенин чертгендиле.
Быллай дерсле Лескен эмда Терк районлада да ётген эдиле. Алада школчуланы бу эсгериу кюнню тарыхы бла шагъырейлендиргендиле, тийишли фильмле да кёргюзтгендиле. Сабийле бла ушакълада алада инсанлыкъ жууаплылыкъ къураугъа, хар адам да мамырлыкъгъа бла ырахатлыкъгъа къошумчулукъ этерге боллугъун ангылатыугъа энчи эс бурулгъанды.