Энчи аскер операциягъа къатышханлагъа себеплик жаны бла эки жюзге жууукъ закон чыгъарылгъанды

Россейни Къырал Думасыны шёндюгю чакъырылыууну депутатлары 2022 жылдан бери энчи аскер операциягъа къатышханлагъа бла аланы юйюрлерине къырал болушлукъ жаны бла 183 законну жарашдырып, къабыл кёргендиле.

Думаны башчысы Вячеслав Володин быллай кёрюмдюле битеу фракцияла бирге келишим ишлегенлерини хайырындан этилгенлерин чертгенди. «Аскерчилерибизни, офицерлени, аланы юйюрлерини битеу къайгъыларын жалчытырча къолдан келгенни этебиз. Ол бизни баш борчубузду», - дегенди ол.

Алай бла депутатла къабыл кёрген законлагъа кёре жер-жерли къаугъаланы ветераны деген даража От тюшюуге къажау къырал службаны къуллукъчуларына, РФ-ни Инсанланы къоруулауну ишлери, къаугъалы болумла эм аланы хаталарын кетериу жаны бла министерствону келечилерине да берилликди: ала Донецк эм Луганск Халкъ республикалада, Запорожск эм Херсон областьлада чачдырыучу затланы излеуге эм аланы жокъ этиуге къатышханлары ючюн. Бу жорукълагъа 2022 жылда февральдан бери борчларын толтургъанла киредиле.

Башха закон СВО-гъа къатышхан инсанны юйюрюне жашау журтну социал найм халда бериуню жорукъларын бирге келишдиреди. Ветеранлагъа эм аланы юйюрлерине медицина болушлукъну бериуню жорукъларын женгиллетиу жаны бла закон да хазырланнганды. 

Андан сора да, энчи аскер операциягъа къатышханланы урунуу гарантиялары кенгертилгендиле. Организацияда ишчилени санын къысхартхан кезиуде, фронтдан къайтырыкъ аскерчилени ишчи жерлерин сакъларгъа кереклиси тохташдырылгъанды. Бу излемге СВО-гъа мобилизация бла чакъырылгъанла, анга келишимни къабыл кёрюп къатышханла да киредиле. Жорукъ 1 сентябрьден ишлеп башлагъанды.  

Законну авторлары бюгюн Россейни эркинлиги ючюн къазауат бардыргъанланы мамыр жашаугъа къайтханда кеслерине жашауда тийишли жер табаргъа, къыралгъа андан ары болушургъа онглары болургъа кереклисине эс бурадыла.