Жылы кюнледе тамакъ аурумазча

Тамакъ ауруу бла кесекле – ала жангызда къышны ауруулары тюйюлдюле. Жайда, кюзню аллында жылы кюнледе да тюбейдиле. Врачла айтханларыча, кондиционерле, анга кёре эшикде бла юйде жылылыкъны терк тюрленнгени, адамла аслам жыйылгъан жерле – ала барысы да бу аурууланы къозгъагъан сылтауланы араларындадыла.

Ауруу кесин кесекле, тамакъны ачытханы, кёпге созулгъан жётел бла билдирип, алай температура артыкъ бек кётюрюлмей эсе, вирус респиратор инфекция болургъа боллукъду. Аны кезиуюнде синусит, бронхит, ЛОР-органлада ауруула да къозгъалырларына къоркъуу чыгъады, алай пневмониягъа ётген кезиуле уа аздыла. Атипичный инфекцияладан сора жётел талай ыйыкъны да тохтамазгъа боллукъду.

Бу ауруула къышдагъылагъа ушайдыла, багъыуну да анга кёре бардырыргъа тийишлиди. Жорукъ бирди – врач жазгъан дарманланы ичерге.