Кесигизни ётюрюклеге алдатмагъыз, саулукълу жашауну сайлагъыз

31 августдан 6 сентябрьге дери кезиуде Россейни Саулукъ сакълау министерствосу сабийлени арасында саулукълу жашауну ниетлерин жайыуну ыйыгъын бардырады. Ол а бютюнда магъаналыды. Нек дегенде шёндюгю заманда сабийлени алдап, саулукъгъа къоркъуулу затланы модагъа кийирирге, алай бла аланы осал къылыкълагъа гитчеликден юйретирге кюрешген кезиуле кёпдюле. 

Юлгюге, электрон тютюнню келтирирге боллукъду. Акъылбалыкъ болмагъанланы «ол жаланда тылпыуду, тютюнча саулукъгъа заран келтирмейди», неда «аны тартсанг, халинг шош болады» деп алдайдыла.

- Ол эм къоркъуулу ётюрюкдю. Вейпни къурамында никотин барды, аны тартхан юйренчек болуп къалады. Дагъыда аны татыулу этер ючюн тюрлю-тюрлю химиялы затла къошадыла, ала уа ёпкени ууландырадыла, нерва системаны ишин бузадыла. Сабийни мыйысы  къуралгъан, айныгъан кезиуде ол бютюнда къоркъуулуду - ол эслилигин тас этеди, къайгъылы болады, хали сылтаусуз тюрленеди, -деп ангылатадыла бизге КъМР-ни Саулукъ сакълау министерствосуну Психиатрияны бла наркологияны клиника арасыны пресс-службасындан.

Аракъы бла наркотикле адамны саулугъуна къаллай хата келтиргенлери белгилиди – алимле айтханларыча, ала 200 аслам аурууну къозгъайдыла. Сабийни санларына ала бютюнда къоркъуулудула: наркоманны, ичгичини психикасы тюрленеди, ала юйюрлерине, жууукъларына ауур боладыла, ишсиз къаладыла, жашауларын, келир кюнлерин бузадыла.

- Аны жаш адамларыбыз ангылап, жашауларында керти да магъаналы затланы сайларгъа керекдиле – спортну, билимни, илмуну, маданиятны, китапланы, айныугъа элтген башха затланы. Алай осал къылыкъланы кесигиз хорлаялмай эсегиз, кеч къалмай, врачха барыргъа, наркологланы болушлугъун алыргъа керекди, - дейдиле клиниканы келечилери.