Школ автобуслада чурум болургъа жарамагъанын ангылап

Жангы окъуу жыл башланырны аллында полициячыла Къабарты-Малкъарда школ автобусланы тинтедиле. Аллай жумушладан бири бу кюнледе Басхан районда тамамланнганды, деп билдиргендиле КъМР-де МВД-ны пресс-службасындан.

МВД-ны «Баксанский» бёлюмюню Къырал автоинспекциясыны келечилери, муниципалитетни администрациясыны эмда билим бериу департаментини ишчилери бла бирге районда бар мектеплени сабийлени ташыгъан быллай улоуларын тинтгендиле.

Автоинспекторла жыйылгъанлагъа сабий къауумланы автобусла бла ташыуну юсюнден тийишли норматив-праволу актланы излемлерин туура этгендиле, алагъа уллу кёллюлюк жууаплылыкъгъа келтирлигин да билдиргендиле.

Сора ызы бла водительлени ишчи стажларын, ала жоллада кеслерин къалай жюрютгенлерин да сюзгендиле. Табылгъан кемчиликлени болжалгъа салмай кетерирге буйрукъ берип, ол заман чыкъгъандан сора, улоуланы къайтарып тинтириклерин билдиргендиле.

Водительле бла ушакъда жоллада жюрюуде жорукъланы эсде тутаргъа, ашыкъмай барыргъа, школланы, адам кёп болгъан жерлени къатлары бла озгъанда бютюнда сакъ болургъа чакъыргъандыла.